Astanada oqýshylardy tamaqtandyrýdan únemdelgen qarajat mektepterge noýtbýk satyp alyp, beinebaqylaý kameralaryn ornatýǵa jumsalyp jatyr, dep habarlaidy QazAqparat.
Nur-Sultan qalalyq bilim basqarmasynyń basshysy Sholpan Qadyrova málim etkendei, elordada qazirgi ýaqytta 182 279 myń bala oqityn 117 mektep bar. Onyń ishinde 91-i memlekettik, 22-i jekemenshik, 1-ýi respýblikalyq fizika-matematika mektebi jáne 3-i Nazarbaev Ziiatkerlik mektebi. Mektep pedagogtarynyń sany - 10302.
«Ózderińiz biletindei 4-shi toqsan qashyqtan oqytý júiesimen bastaldy. Ol úshin onlain rejimde Google Classroom, Microsoft Teams, Google meet, Hangouts Meet, Zoom platformalary qoldanyldy. Kundelik, Daryn Online, Bilimland, what'sApp, Telegramm, Google Disc, elektrondyq poshta paidaǵa jarady. Sondai-aq «Balapan», «El arna» telearnalarynyń beine-sabaqtary paidalanylýda. Qashyqtan oqýdyń nátijeligin arttyrý maqsatynda oqýshylar men pedagogtardyń kompiýterlermen jáne internet jelisine qoljetimdiligine monitoring júrgizildi. Mektep esebindegi 7118 kompiýter kópbalaly, az qamtylǵan otbasylardaǵy 6500 oqýshyǵa jáne qajettilik tanytqan 618 pedagogke ýaqytsha paidalanýǵa berildi», - dedi Sholpan Qadyrova búgin ótken baspasóz máslihatynda.
Basqarma basshysynyń aitýynsha, qosymsha 2 613 noýtbýk jáne internetpen qamtamasyz etý úshin 5 200 flesh-karta satylyp alynǵan.
«Bul qarajat 1-4 synyptardyń tamaqtanýynan únemdeý esebinen paidalanyldy. Sondai-aq qalǵan somasy beinebaqylaýdy qamtamasyz etýge baǵyttaldy», - dedi ol.
