Nur-Sultan qalasynda múgedek balany avtobýsqa otyrǵyzyp, onyń anasyn almai ketken qoǵamdyq kólik júrgizýshisi jazaǵa tartyldy, dep habarlaidy "Ult aqparat".
«№1 avtobýs parki keńesiniń tártiptik qorytyndysyna sáikes, 2021 jylǵy 11 qańtar kúni №60 avtobýstyń júrgizýshisi jolaýshylardy tasymaldaý týraly erejeni saqtamaǵan. Ony avtobýs salonynda túsirilgen videojazba dáleldep otyr. Avtobýs júrgizýshisinen jazbasha túsinikteme alyndy. Avtobýs parki keńesiniń sheshimine sáikes, búginde tártipti buzǵan júrgizýshimen eńbek kelisimsharty úzildi. Bolǵan oqiǵa qaitalanbaý maqsatynda barlyq avtobýs júrgizýshiler quramy jolaýshylardy qoǵamdyq kólikke otyrǵyzý jáne odan túsirý erejesimen qaita tanystyryldy», - dedi CTS (City Transportation Systems) JShS-niń baspasóz hatshysy Oksana Loskýtova.
Onyń aitýynsha, júrgizýshi jumystan qýylýymen qatar, oǵan aiyppul da salyndy.
«Nur-Sultan qalasy Ákimshilik politsiia basqarmasy QR Ákimshilik quqyqbuzýshylyq kodeksiniń №593 babyna sáikes qoǵamdyq kólik júrgizýshisine 5 AEK kóleminde aiyppul saldy. Óz kezeginde №1 elordalyq avtobýs parki ákimshiligi júrgizýshiniń beiádep áreketi úshin keshirim suraidy», - deidi ol.
Eske sala ketsek, osydan birer kún buryn elorda turǵyny qoǵamdyq kólikke múgedek balany otyrǵyzyp, onyń anasyn tastap ketkeni týraly Facebook paraqshasynda jazǵan bolatyn.
