Foto: ashyq derekkóz
Astanada sintetikalyq esirtki óndirýge arnalǵan iri qoima áshkerelendi. Bul týraly Ishki ister ministrligi «Zań men tártip» qaǵidaty aiasynda júrgizilip jatqan jumystar nátijesinde málimdedi.
Tájiribe kórsetkendei, esirtki taratýmen ainalysatyndar sintetikalyq jáne psihoaktivti zattardy jasyryn óndirý úshin túrli himiialyq prekýrsorlardy paidalanady. Olar bul zattardy satyp alý, saqtaý jáne tasymaldaýdyń qupiia joldaryn uiymdastyryp, halyq densaýlyǵyna asa qaýipti «mef» pen «jyldamdyq» sekildi esirtki túrlerin shyǵarýǵa árekettenedi.
Jedel-izdestirý sharalary barysynda elordadaǵy garaj kooperativteriniń birinen jalpy salmaǵy 4 tonna bolatyn 200 kanistra saqtalǵan jasyryn qoima anyqtaldy. Atalǵan kanistrlerde sintetikalyq esirtki daiyndaýǵa qajetti prekýrsorlar bolǵan.
Jyl basynan beri, 16 sáýirdegi resmi derekke sáikes, zańsyz ainalymnan 11 tonnadan astam prekýrsor tárkilengen. Mamandardyń baǵalaýynsha, bul kólemnen shamamen 1,5 tonna sintetikalyq esirtki óndirilmek bolǵan.
Ishki ister ministrligi eskertkendei, 2026 jylǵy 1 qańtardan bastap prekýrsorlardyń zańsyz ainalymy úshin Qylmystyq kodekstiń 301-baby boiynsha qylmystyq jaýapkershilik engizildi. Atalǵan bapqa sáikes, kináliler 15 jylǵa deiin bas bostandyǵynan aiyrylýy múmkin.
Quzyrly organdar esirtki óndirý men taratýǵa baǵyttalǵan kez kelgen áreket zań aiasynda qatań túrde toqtatylatynyn málimdedi.
