Elorda tórinde adamzattyń asyl táji Muhammed (oǵan Allanyń salaýaty men sálemi bolsyn) paiǵambarymyzdyń qurmetine orai «Ǵalamnyń raqym nury» atty Máýlit keshi ótti, – dep habarlaidy «Ult aqparat».
Qasietti Quran aiattarymen bastaý alǵan Máýlit keshi ardaqty paiǵambarymyzǵa (oǵan Allanyń salaýaty men sálemi bolsyn) joldanǵan sansyz salaýattarmen berekelendi. QMDB tóraǵasy, bas múfti Serikbai qajy Oraz barsha múminderdiń mereili merekesi – Máýlit meiramymen quttyqtap, Áz Elshige (oǵan Allanyń salaýaty men sálemi bolsyn) degen mahabbat imanymyzǵa qýat, janymyzǵa azyq ekenin atap ótti. Alqaly jiynǵa elorda ákimi de óz izgi tilegin joldap, shahar turǵyndaryn mereili merekemen quttyqtady.
Kesh aiasynda elimizge belgili qari Jumanazar Sadyrhanov pen Arman Ǵabdýllinniń qos tilde oryndaǵan Máýlit jyrynyń kórermender úshin orny bólek bolǵandai. Sondai-aq, paiǵambarymyzǵa (oǵan Allanyń salaýaty men sálemi bolsyn) degen saǵynyshtaryn ánmen jetkizgen Qurmash Mahanov, Beibit Qushqaliev, Serjanáli Álibek syndy óner juldyzdary da búgingi keshtiń shyraiyn kirgize tústi. Elimizge belgili «Óner qyrandary» teatry da rýhani keshke óz úlesterin qosyp, kórermenge «Paiǵambardy saǵyný» qoiylymyn usyndy
Máýlit keshiniń taǵy bir taǵylymdy sharasy – dástúrli «Máýlit syilyǵyn» tabystaý rásimi boldy. Jyl saiyn dástúrli túrde ótkizilip kele jatqan Máýlit keshinde QMDB tóraǵasynyń birinshi orynbasary, naib múfti, Nur-Sultan qalasynyń bas imamy Naýryzbai qajy Taǵanulynyń bastamasymen birneshe jyldan beri arnaiy «Máýlit syilyǵy» tabystalyp keledi.
Berekeli kesh barysynda atalǵan qujatta kórsetilgen imandylyq, otanshyldyq, aýyzbirshilik, bilimdilik, mádeniettilik, eńbekqorlyq, amanatshyldyq sekildi asyl qasietter boilarynan kórinis tapqan abzal jandar marapatqa ie bolyp, halyq aldynda mereileri asqaqtady.
