Nur-Sultan qalasy Esil aýdanynyń ákimi Berik Jákenov elordada masamen kúreske baǵyttalǵan qandai jumystar júrgizilip jatqanyn aitty, dep habarlaidy "Ult aqparat".
Facebook-tegi Astananyń adaldyq alańy paraqshasynda ótken onlain brifing barysynda «Úrker» shaǵyn aýdanynyń turǵyndary masanyń kóptigine shaǵymdanǵan bolatyn.
«Bul ózekti másele ekendigin bárimiz túsinemiz. Ol jer batpaqty bolyp keledi. Qazirgi ýaqytta masany ýlaý ortalyqtandyrylǵan, bir ákimshi ainalysyp jatyr. Búginde masany ýlaýdyń ekinshi kezeńi júrgizilý ústinde. Osydan úsh kún buryn ǵana olar Qorǵaljyn tas joly jaqtan masany ýlaýdy bastady», - dedi Esil aýdanynyń ákimi.
Onyń atap ótýinshe, masamen kúreske baǵyttalǵan jumystar qarqyndy júrgizilip jatyr.
«Keshe jeldi aýa raiy kezinde 1 masanyń 30 shaqyrymǵa deiin ushyp bara alatyndyǵyn oqyǵan edim. Jalpy, tek ýlaý jumystaryn ǵana júrgize bermei bul máseleni júieli túrde sheshý qajet. Kei jerde ósimdikterdiń qasietine de den qoiǵan durys bolar. Masany qýatyn ósimdiktiń túri kóp. Máselen, olardyń biri - jýsan. Biraq, keibir turǵyndardyń bul ósimdikke allergiiasy bar. Degenmen, bul ósimdik masany qýýda jaqsy qural bolar edi», - dedi Berik Jákenov.
