Elordada marshrýttyq avtobýsty urlap, aidap ketken er adam ustaldy, dep habarlaidy "Ult aqparat" qalalyq politsiia departamentine silteme jasap.
«3 aqpan kúni saǵat 07:06-da «102» nómirine marshrýttyq avtobýs júrgizýshisinen shaǵym kelip tústi. Jetigen, 34 mekenjaiynda belgisiz er adam «MAN SL» markaly avtobýsty aidap áketken. Júrgizýshiniń aitýynsha, tańerteń avtobýsty otaldyryp, qyzdyrý úshin ýaqytsha qaldyrǵan. Ol dispetcher bólimine kirip shyqqansha, kezdeisoq ótip bara jatqan er adam jolaýshylar avtobýsyn aidap áketken», - dep habarlady Nur-Sultan qalalyq politsiia departamenti.
Biraq ol alysqa uzamaǵan. Tártip saqshylary saǵat 7:18-de videobaqylaý kameralary arqyly ony Respýblika dańǵyly men Y. Dúkenuly kóshesiniń qiylysynda ustady.
«Meditsinalyq tekserý barysynda, 28 jastaǵy turǵynnyń alkogoldi ishimdikke ortasha deńgeide mas bolǵany anyqtaldy. Atalǵan fakt boiynsha QR Qylmystyq kodeksiniń 200-baby, 1-bóligine sáikes sotqa deiingi tergeý júrip jatyr», - deidi departamenttiń baspasóz qyzmeti.
