Senbi kúni, 13 tamyzda QR Premer-Ministri Álihan Smaiylov Nur-Sultan qalasyndaǵy jańa óndiristik jáne áleýmettik nysandar qurylysynyń barysymen tanysty, dep habarlaidy "Ult aqparat" primeminister.kz saityna silteme jasap.
Úkimet basshysy «Astana Tehnopolis» AEA aýmaǵyndaǵy «YDA Industrial Park» kópbeiindi zaýytynyń qurylys alańyna bardy. Kásiporyn meditsinalyq jabdyqtar, meditsinalyq jáne keńse jihazdaryn, modýldik qurama qurylystar, sondai-aq qasbetter, vitrajdar, terezeler men esikter óndirý boiynsha integratsiialanǵan keshen bolyp tabylady. Zaýyt ónimderi tek ishki naryqqa ǵana emes, kórshi elderge de eksporttalatyn bolady. Jalpy quny 46 mln dollardan asatyn joba sheteldik investorlar esebinen júzege asyrylyp jatyr.
Premer-Ministr zaýytty iske qosý qazirgi kezde shetelden ákelinetin ónim importyn almastyrýǵa oń áserin tigizetinin atap ótti.
«Elimizde kásipkerlik erkindigin qamtamasyz etýge jáne investitsiialyq ahýaldy jaqsartýǵa baǵyttalǵan ekonomikalyq reformalar júzege asyrylyp jatyr. Biz investorlardyń kelýin árdaiym qoldaimyz. Bul joba – Qazaqstanda tiimdi jumys istep, kórshi aimaqtardyń naryqtaryna shyǵýǵa bolatyndyǵynyń dáleli», — dedi Úkimet basshysy.
Óz kezeginde «YDA Group» basqarma tóraǵasy Hýsein Arslan bes kásiporynnyń tórteýi Qazaqstanda alǵash ret ashylatynyn atap ótti.
«Qazaqstandyq tarapqa belsendi qoldaý kórsetkeni úshin alǵysymdy bildiremin. Biz tiisti ministrlikpen tyǵyz yntymaqtastyqta jumys isteimiz, sondyqtan ózimizge senimdimiz», — dedi Hýsein Arslan.
Sonymen qatar Úkimet basshysy eki aýysymda 2400 oqýshyny qabyldaý áleýeti bar 1200 oryndyq jańa jalpy bilim beretin mektep qurylysynyń barysymen tanysty. Oqý orny halyq tyǵyz ornalasqan Esil aýdanynda salynyp jatyr, bul №84 jáne №85 mektep-litseilerinde oryn tapshylyǵy máselesin sheshýge múmkindik beredi. Mektepti jyl sońynda paidalanýǵa berý josparlanyp otyr.
Jalpy, biyl elordada 11 mekteptiń qurylysyn aiaqtaý kózdelgen. Bul qosymsha 23 myńnan astam oqýshy ornyn ashýǵa múmkindik beredi.
«Sońǵy jyldary jyl saiyn 400 myńǵa jýyq bala dúniege kelýde. Olardyń bári qazirgi tańda mektepke baryp jatyr, al mektepterdiń shamadan tys júktelýi baiqalady. Sondyqtan mektep qurylysyn respýblikalyq biýdjetten qarjylandyrýdy ulǵaitý josparlanyp otyr. Elordanyń jańa mektepterinde jaraqtandyrýdyń joǵary standarttary qalyptasqan. Balalarǵa qolaily jaǵdaida oqýǵa múmkindik berý úshin elimizde salynyp jatqan basqa da bilim mekemelerinde osy standarttardyń bolǵanyn qalaimyz», — dedi Premer-Ministr.
Sondai-aq Álihan Smaiylov Á. Bekturov kóshesi boiyndaǵy 577 páterlik turǵyn úidiń qurylysyna bardy. Onyń 189 páteri apatty úilerdiń turǵyndaryna beriledi.
«Sońǵy úsh jylda elordada turǵyn úi qurylysy boiynsha bes jyldyq kórsetkish ájeptáýir artty – 2019 jyldan bastap 8 mln sharshy metr turǵyn úi paidalanýǵa berildi. Jalpy, Memleket basshysynyń tapsyrmasy boiynsha elordada Qoljetimdi turǵyn úi qurylysynyń kólemi bes eseden astam ulǵaidy», — dedi Úkimet basshysy.
Sondai-aq Álihan Smaiylov Úkimet atynan qurylys salasynyń qyzmetkerlerin kásibi merekelerimen quttyqtady.
«Qurylys - otandyq ekonomikanyń mańyzdy jáne serpindi damyp kele jatqan salasy. Biyl birinshi jartyjyldyqta qurylys kólemi 9%-dan astam ulǵaidy, 6,6 mln sharshy metrden astam turǵyn úi paidalanýǵa berildi. Osy múmkindikti paidalana otyryp, elimizdiń qurylysshylary men sala ardagerlerine tolaiym tabys, zor densaýlyq jáne amandyq tileimin!», — dedi Álihan Smaiylov.
Sondai-aq jumys saparyna indýstriia jáne infraqurylymdyq damý ministri Qaiyrbek Óskenbaev pen elorda ákimi Altai Kólginov qatysty.
