Elordada kommýnaldyq tólem baǵasy aiaq astynan negizsiz ósti degen pikirge qatysty qala basshysy jaýap berdi, dep habarlaidy "Ult aqparat".
«Ótken jyldyń jeltoqsan aiynda kúnniń kúrt sýytýyna bailanysty, kómir ádettegiden kóbirek jaǵyldy. Mysaly, qarasha aiynda kúnine 150 vagon kómir jaǵylsa, jeltoqsan aiynda 350 vagon kómir jaǵyldy. Sáikesinshe shyǵyn da kóp degen sóz. Iaǵni barlyǵy da aýa-raiyna bailanysty bolyp otyr», - dedi elorda ákimi Altai Kólginov tilshilerdiń suraqtaryna jaýap bere turyp.
Sondai-aq, ákim aýa-raiynyń ózgerýine qaramastan, kommýnaldyq tólem baǵasy óspeitinin aitty.
«Qazirgi ýaqytta elordada kommýnaldyq tólem baǵasy burynǵysynsha, baǵa ózgergen joq jáne ázirge ózgermeidi. Bul týraly óz atymnan resmi túrde málim etemin», - deidi ol.
Eske sala ketsek, osydan birer kún buryn elordalyqtar áleýmettik jeli arqyly kommýnaldyq tólem baǵasynyń aiaq astynan negizsiz qymbattaǵany týraly shaǵym bildirgen bolatyn.
