Elordada «Jalpyhalyqtyq plebistsit: jańa múmkindikter men damý bolashaǵy» taqyrybynda Qazaqstan halqy Assambleiasy Jýrnalister klýbynyń otyrysy ótti, dep habarlaidy Baq.kz agenttigi.
Is-sharaǵa AQDM «Qoǵamdyq kelisim» RMM direktory Ǵalymjan Qusmanǵali, «Abai tv» telearnasynyń direktory Azamat Keńesuly, sondai-aq basqa da tanymal jýrnalister, blogerler jáne Nur-Sultan qalasy etnomádeni birlestikteriniń ókilderi qatysty.
Otyrystyń ashylýynda sóz alǵan AQDM «Qoǵamdyq kelisim» RMM direktory Ǵalymjan Qusmanǵali referendýmnyń mańyzdylyǵyna toqtalyp ótti.
"Prezident usynǵan reformalar - el ómiriniń barlyq salasyn qamtityn keshendi jospar. Sol sebepti ol ózgeristerdi ómirge engizý bárimizdiń, iaǵni árbir Qazaqstan azamatynyń atsalysýyn qajet etedi. Ár qazaqstandyqtyń pikiri el taǵdyry úshin mańyzdy. Referendým siiaqty saiasi tetiktiń 27 jyl ótkennen keiin qoldanylýy, aldaǵy ýaqytta qabyldanatyn sheshimniń tarihi mańyzdylyǵyn taǵy da bir márte aiqyndap otyr", - dedi ol.
Ǵalymjan Qusmanǵalidiń sózinshe, Qazaqstan halyq assambleiasy táýelsizdik jyldary halyq birligin nyǵaitý isine belsendi aralasty. Degenmen ózgerister qazirgi zaman talaby. Búgingi basqosý sonyń bir tarmaǵy bolyp otyr.
"Óitkeni bul otyrys assambleianyń ózimen qatar, qurylymdarynyń da, onyń ishinde Jýrnalister klýbynyń da jumysyn jańa formatqa kóshirýmen tikelei bailanysty. QHA janyndaǵy Jýrnalister klýby etnosaralyq tatýlyqty nyǵaityp, jýrnalistik etika qaǵidattaryn qalyptastyryp, jaýapkershilikti kúsheitý úshin respýblikalyq jáne óńirlik BAQ-tyń ókilderiniń, atap aitqanda, jýrnalisterdiń, blogerlerdiń, sarapshylardyń kúsh-jigerin bir arnada toǵystyrý maqsatynda 2019 jyly qurylǵan", - dedi «Qoǵamdyq kelisim» direktory.
Ol búgingi otyrysta Jýrnalister klýby múshesiniń jańa quramy jinalyp otyrǵanyn eske saldy. Klýbtyń tóraǵasy - «Abai tv» telearnasynyń direktory Azamat Keńesuly.
Aita keteiik, kezdesý barysynda qatysýshylar ashyq áńgime formatynda qazirgi tańda eldegi ózekti máselelerdiń biri – konstitýtsiialyq reformalar men respýblikalyq referendým jaiynda sóz órbitti.
