Nur-Sultandaǵy «Dáýlet» sport kesheninde Qazaq kúresinen VIII Álem birinshiligi ótip jatyr, - dep habarlaidy QazAqparat.
«Dúniejúzilik Qazaq kúresi federatsiiasy 15 jyldyń ishinde 52 memlekette federatsiiasyn ashqan bolatyn. Búgin bastalǵan álem chempionatyna 36 memleket qatysýǵa tilek bildirdi. 36 memlekettiń qyzdar jáne erler tobynyń balýandary tolyq quramda keletinin aitqanymen, aýa raiynyń qolaisyzdyǵyna bailanysty 8 komanda jarysqa keshigip qaldy. Iaǵni, 28 eldiń balýany boz kilemge shyqty», - dedi Dúniejúzilik Qazaq kúresi federatsiiasynyń atqarýshy direktory Talǵat Mázibaev týrnir barysynda.
Onyń aitýynsha, Qazaq kúresinen baǵyn synamaqqa kelgen balýandardyń ishinde dziýdo, erkin kúres syndy sport túrlerinen aty shyǵyp júrgen sportshylar barshylyq.
«Ózbekstan, Grýziia, Mońǵoliia, Latviia, Belarýs komandalarynyń quramynda Olimpiada oiyndaryna qatysqandar, sambodan birneshe dúrkin chempion atanǵan sportshylar bar. Júlde qory – 70 myń AQSh dollaryn quraidy. Ár oryndarǵa bólinip beriledi. Demeýshiler búkil elden kelgen sportshylardyń kelý-ketýge shyǵatyn shyǵynyn kóterip otyr. Óitkeni, biz Qazaq kúresi sekildi damýshy kúres túrinen saiys ótkizip jatyrmyz. Japondar sekildi óz kúresimizdi alǵa jeteleý úshin aqsha salýymyz kerek», - deidi ol.
Búgin erler men qyzdar úsh-úsh salmaqtan, erteń de dál osyndai tártip boiynsha boz kilemde ózara myqtyny anyqtaidy.
Jarystyń alǵashqy jeńimpazy da belgili boldy. Qyzdar arasyndaǵy 55 keli salmaqta birinshi orynǵa Zarina Abdýrahmanova (Túrikmenstan) ie bolsa, ekinshi jáne úshinshi oryndardy Anara Rysqulova (Qyrǵyzstan) men Mariia Liatiri (Grekiia) ielendi. 60 keli salmaqta birinshi oryn Gantsetseg Ganboldtyń (Monǵoliia) qanjyǵasynda ketti. Atalmysh salmaqta ekinshi jáne úshinshi oryndy Meiirim Momynova (Qyrǵyzstan) men Tolǵanai Ábeýova (Qazaqstan) mise tutty.
Týrnir tolyqtai UWW resmi ókilderi men halyqaralyq dárejedegi tóreshileriniń qatysýymen ótkizilip jatyr. Jarysty uiymdastyrýshylar – Birikken Kúres Álemi, Nur-Sultan qalasynyń ákimdigi, Dúniejúzilik «Qazaq kúresi» federatsiiasy. Álem chempionatyna demeýshi – «Eurasian Resources Group» (ERG).
Eske sala ketsek, keshe elordada alys-jaqyn shet elderdiń ókilderiniń qatysýymen Dúniejúzilik «Qazaq kúresi» federatsiiasynyń halyqaralyq kongresi ótken bolatyn. Kongres barysynda Alik Shpekbaev atalǵan federatsiiasynyń prezidenti, al akter ári rejisser, Qazaqstannyń halyq ártisi Doshan Joljaqsynov Dúniejúzilik «Qazaq kúresi» federatsiiasynyń «Qurmetti prezidenti» bolyp sailandy.
