Nur-Sultan qalasynyń iývenaldy politsiia qyzmetkerleri kámeletke tolmaǵandar arasyndaǵy tártip buzý men qylmystyń aldyn alý maqsatynda únemi tekserý júrgizip turady, dep habarlaidy "Ult aqparat" Nur-Sultan qalasynyń Politsiia departamentine silteme jasap.
Jyl basynan beri iývenaldy qyzmet politseileri kámelet jasyna tolmaǵan balalardyń túnde oiyn-saýyq mekemeleri men kóshede júrgeni úshin 111 zańdy ókildi jazalady.
Jasóspirimderdiń oiyn-saýyq mekemelerinde júrgenine ata-ana ǵana emes, mekeme basshysy da jaýap beredi.
Ótken jeksenbide politseiler ákimdik pen Nur-Sultan qalasynyń Qalalyq orta sapasy jáne baqylaý basqarmasy ókilderimen birlesip 23:00-de Abylai han dańǵylynda ornalasqan «R the Room» kompiýter klýbynda 17 jastaǵy jasóspirimniń bolǵanyn anyqtady.
Oiyn-saýyq mekemesiniń basshysy QR ÁQBtK 132-baby boiynsha jaýapqa tartylyp, oǵan aiyppul salyndy. Sondai-aq karantin tártibin buzǵany úshin ákimshilik jaýapqa tartý maqsatynda mekeme basshysyna qatysty material jinalyp, Nur-Sultan qalasynyń Qalalyq orta sapasy jáne baqylaý basqarmasyna jiberildi.
Politsiia departamenti kámelet jasyna tolmaǵan balalarǵa 22:00-6:00 aralyǵynda oiyn-saýyq mekemelerine barýǵa, al 23:00-6:00 aralyǵynda kóshede zańdy ókilinsiz júrýge tyiym salynatynyn eskertedi. Bas sanitariia dárigeriniń qaýlysymen kompiýter jáne oiyn klýbtarynyń qyzmeti múldem toqtatylǵan.
Politsiia departamenti balalardyń 22.00-den keiin baqylaýsyz kóshede júrgeni úshin jáne sýbektilerdiń karantin erejesin saqtamaǵany úshin ákimshilik jaýapqa tartylatynyn eskertedi.
