Nur-Sultanda karantin talaptaryn buzýshylardy anyqtaý jáne tiisti shara qoldaný jumystary jalǵasýda, dep habarlaidy qalalyq Politsiia departamentiniń baspasóz qyzmeti.
Baspasóz qyzmeti taratqan málimetterge qaraǵanda, Nur-Sultan qalasynda mobildi toptar bir táýlikte 60-qa jýyq nysandy tekserip, 8 karantin rejimin buzý jaǵdaiyn anyqtady.
Naqtyraq aitqanda, bas sanitarlyq dárigerdiń koronavirýs infektsiiasynyń taralýyna jol bermeý jónindegi qoldanystaǵy qaýlysyn ákimshilik pen qoǵamdyq tamaqtaný nysandary men oiyn-saýyq oryndarynyń ieleri júieli túrde buzyp, sanitarlyq talaptardy eskermei otyr.
Mysaly, saǵat 23:00-de Samal kóshesindegi «Respawn» kompiýterlik klýbyna 15 adam jinalyp, jelide oiyn oinaǵan. Osylaisha, qamsyz júrgen jastar sanitarlyq talaptardy elemei, onyń saldaryn oilamai, jaqyndaryna qaýip tóndirip otyr.
Mobildi toptar reid barysynda Mailin kóshesinde tún ortasynda meimandardy qabyldaǵan karaoke bardy anyqtady. Atalǵan nysanda tekserý kelgende 30-dan astam adam demalyp otyrǵan. Eń soraqysy bul nysan karantin talaptaryn osyǵan deiin de birneshe ret buzǵan jáne jaýapqa tartylǵan.
Zań buzýshylarǵa qatysty jinalǵan material oiyn-saýyq mekemesiniń qyzmetin toqtata turý týraly máseleni qarastyra otyryp, ákimshilik jaýapqa tartý úshin taýarlar men qyzmetterdiń sapasy men qaýipsizdigin baqylaý basqarmasyna jiberildi.
Nur-Sultan qalasynyń Politsiia departamenti karantindi buzǵany úshin jaýapkershilik qarastyrylǵany týraly eskertedi jáne elorda turǵyndaryn sanitarlyq normalar men áleýmettik qashyqtyqty saqtaýǵa shaqyrady.
Aldaǵy demalys kúnderi mobildi toptar kúsheitilgen rejimde karantin sharalaryn buzǵandardy anyqtaý maqsatynda reid ótkizbek.
