Elordada karantindik talaptardy elemei júrgender kóptep kezdesýde. Bul týraly Nur-Sultan qalasynyń bas sanitarlyq dárigeri Janna Pirálieva málim etti, dep habarlaidy QazAqparat.
«Shekteý jáne karantindik sharalardy saqtaý boiynsha túsindirý profilaktikalyq jumystarynyń júrgizilýine qaramastan, kásipkerlik sýbektileri men jeke tulǵalar maskalyq rejimdi, obektilerdiń jumys rejimin buzýdy jalǵastyrýda. Áleýmettik qashyqtyqty saqtamaidy, antiseptikterdi paidalanbaidy, sondai-aq buqaralyq ári otbasylyq is-sharalardy ótkizýge tyiym salynǵanyna qaramastan, toi, keshter jáne basqa da jiyndar ótkizedi», - dedi J. Pirálieva onlain rejimde ótken koronavirýstyq infektsiianyń aldyn alý sharalary boiynsha baspasóz máslihatynda.
Onyń aitýynsha, qalada koronavirýstyq infektsiianyń taralýyn boldyrmaýǵa baǵyttalǵan Nur-Sultan qalasynyń bas sanitarlyq dárigeriniń qaýlylarynda kórsetilgen sanitariialyq epidemiiaǵa qarsy sharalardy nysandarda oryndaý boiynsha monitoring jalǵasýda.
«2020 jylǵy 5 shilde men 4 qarasha aralyǵynda Nur-Sultan qalasynda jumys istep turǵan 9 mobildi toppen barlyǵy 4 462 nysan qamtyldy. Onyń ishinde tamaqtaný nysandary - 1 500, kommýnaldyq obektiler – 510, balabaqshalar – 53, mektepter – 130, bilim berý ortalyǵy - 10, densaýlyq saqtaý nysandary – 52, saýda nysandary (dúkender, bazarlar, saýda ortalyqtary, saýda úileri) – 1 515, ónerkásiptik nysandar – 5, óndiristik nysandar - 79, áleýmettik nysandar – 3, oiyn-saýyq oryndary – 35, sondai-aq biliard, loto klýby, internet klýby jáne basqalary- 570», - dedi Janna Pirálieva.
