Elordada karantin rejimin buzǵan oiyn-saýyq oryndary anyqtaldy. Zań buzǵandar jalpy somasy 27 377 790 teńge ákimshilik jaýapqa tartyldy, dep habarlaidy Nur-Sultan ákimdiginiń resmi saity.
5 tamyzǵa qaraǵan túni monitoring toby politsiia qyzmetkerlerimen jáne taýarlar men qyzmetterdiń sapasy men qaýipsizdigin baqylaý basqarmasymen (TQSQBB) birlesken kezekti reid kezinde kásipkerlik sýbektileri tarapynan karantin rejimin buzý áreketterin anyqtady.
«Búgingi monitoring barysynda qoǵamdyq tamaqtaný, saýda jáne qyzmet kórsetý nysandarynda birqatar zańbuzýshylyqtar anyqtaldy. Olardyń kópshiligi jumys kestesin buzý, jumysshylar men kelýshilerdiń maska taǵý tártibin buzý, áleýmettik qashyqtyq saqtamaý siiaqty árekettermen bailanysty», - dep habarlady Esil aýdandyq taýarlar men qyzmetterdiń sapasyn men qaýipsizdigin baqylaý basqarmasynyń basshysy Arman Qurbanov.
«Monitoring toby aralaý kezinde Esil aýdanynda «Pei Zdes' 31» laýndj-barynda (JK «ORIENT-S») qyzmetkerler men qonaqtar áleýmettik qashyqtyq saqtamai, karantin rejimin, maska taǵý tártibin buzǵanyn anyqtady. Atalǵan nysannyń basshylarymen jáne ákimshiligi tarapynan túsindirý júrgizilip, ákimshilik hattamany resimdeý úshin materialdardy tapsyrý týraly hattama jasaldy», - dedi Nur-Sultan ákimdiginiń Azamattyq qorǵanys ortalyǵynyń bas mamany Áset Abylǵaziev.
Sonymen qatar Saryarqa aýdanynda reid kezinde mobildi top «Nirvana» jáne «Ýgol 4/1» klýbtaryndaǵy karantin rejimin buzýshylardy anyqtady. 4 tamyzdaǵy jaǵdai boiynsha, Nur-Sultan Taýarlar men qyzmetterdiń sapasy men qaýipsizdigin baqylaý basqarmasynyń aýdandyq basqarmalaryna aýdandyq politsiia basqarmalarynan karantindi buzǵandar týraly 544 material kelip tústi. Olar boiynsha 124 jeke jáne kásipkerlik sýbektileri jalpy somasy 27 377 790 teńge ákimshilik jaýapqa tartyldy.
QR ÁQBtK 811-babyna sáikes, karantindi buzǵan adamdar kinásin moiyndaǵandyqtan, ákimshilik aiyppuldar qysqartylǵan túrde qoldanyldy. Búgingi kúni jalpy somasy 15 542 910 teńgeni quraityn 63 ákimshilik aiyppul tólendi.
