Elordada karantin rejimin buzǵan 300-den astam adam jaýapqa tartyldy. Bul týraly Nur-Sultan qalasy Politsiia departamentiniń basshysy Erjan Sádenov málim etti, dep habarlaidy QazAqparat.
«Karantin rejiminiń kúsheitilýine qaramastan, keibir azamattar qoǵamdyq tártipti buzyp, kóshede júrgen. Úsh kúnniń ishinde, iaǵni 28-30 naýryz kezeńinde politsiiaǵa 307 adam jetkizildi. Olarǵa qatysty ákimshilik jaza qabyldandy. Sonymen qatar, eki myńnan astam profilaktikalyq túsindirý sharalary júrgizildi», - dedi E. Sádenov «Habar 24» telearnasynda ótken onlain brifingide.
Onyń sózine qaraǵanda, 22 naýryzdan bastap tótenshe jaǵdai rejimin buzǵany úshin 369 adam ákimshilik jaýapkershilikke tartyldy, onyń ishinde 86-sy qamaýǵa alyndy, 202 adamǵa aiyppul salyndy. Sonymen qatar, 69 adamǵa eskertý jasalsa, 17 is sotta qaralýda.
«Blok-beketterinde 98 adam jazaǵa tartyldy, onyń ishinde 80 adam qamaldy, 14 adamǵa aiyppul salyndy, 4 is sotta qaralýda», - dedi E. Sádenov.
