Elordada karantin rejimin buzǵan 135 adam ákimshilik qamaýǵa alyndy. Bul týraly búgin Ortalyq kommýnikatsiialar qyzmetindegi onlain-brifingte Nur-Sultan qalalyq Politsiia departamentiniń bastyǵy Erjan Sádenov aitty, dep habarlaidy "Ult aqparat".
«Ókinishke orai keibir azamattar aitylǵan eskertýlerge qulaq aspai, karantin rejimin buzýda. Túrli quqyq buzýshylyq úshin politsiia bólimderine 2 838 adam jetkizildi. Onyń ishinde 1 770 adam ákimshilik jaýapkershilikke tartyldy. Qamaýǵa alynǵandar - 166, aiyppul salynǵandar - 1 126, eskertý alǵandar - 408 adam, al sot qaraýynda 70 material bar. Ákimdiktiń kommýnaldyq turaǵyna 588 avtokólik qoiyldy. 36 júrgizýshi mas kúiinde ustalyp, júrgizýshi quqyǵynan aiyryldy. 67 jaiaý júrginshige aiyppul salyndy, 135 adam ákimshilik qamaýǵa alyndy», - dedi departament basshysy.
Erjan Sádenovtiń dereginshe, blokposttardyń shekarasyn buzǵany úshin 174 adam jaýapqa tartyldy. Onyń ishinde 124 adam qamaýǵa alyndy.
«Karantin rejimin buzýshylardyń bárin birdei ustaý bizdiń mindetimiz emes. Bizdiń qyzmetkerler azamattarǵa kúndelikti túsindirý jumystaryn júrgizedi. Karantin normasyn buzǵandarǵa ǵana shara qoldanamyz», - dedi ol.
