Qaraqshylar Nur-Sultandaǵy JShS-nyń biriniń jumysshylaryna shabýyl jasap, 3 million teńge kólemindegi qarajatty urlap ketken, dep habarlaidy "Ult aqparat" elordalyq Politsiia departamentiniń baspasóz qyzmetine silteme jasap.
«Esil» aýdany politsiia basqarmasyna JShS menedjeri Máńgilik el kóshesinde ózine belgisiz bireýler shabýyl jasap, 3 mln teńge kólemindegi qarajatyn urlap ketkenin habarlady. Jábirlenýshiniń aitýynsha, saǵat 20:00 shamasynda ol JShS býhgalterimen birge bankomattan 10 mln 900 myń teńgeni qolma-qol aqshaǵa ainaldyrǵan. Terminaldar ornalasqan ǵimarattan shyǵyp, olar avtokólikke qarai bet alǵan. Osy ýaqytta 4 jigit menedjerge shabýyl jasap, aqsha salynǵan paketin tartyp almaqqa árekettenip ony ura bastaǵan. Tóbeles kezinde shabýyldaýshylar gaz ballonyn qoldanyp, 3 mln teńgeni tartyp alǵan da rýlde sybailasy otyrǵan kólikke minip, izderin sýytqan», - dedi vedomstvonyń baspasóz qyzmetinde.
Jedel-izdestirý is-sharalaryn júrgizý barysynda politsiia 18-den 23 jasqa deiingi qaraqshylyq shabýylǵa kúdikti jeti jigitti ustady. Qazirgi ýaqytta atalǵan fakti boiynsha QR QK192-baby, 4-tarmaǵyna (Qaraqshylyq) sáikes sotqa deiingi tergeý amaldary júrgizilýde. Qylmystyq is boiynsha aiyptalýshylardyń barlyǵy PD ýaqytsha ustaý izoliatoryna qamaldy.
Kúdiktiler tonalǵan qarajattyń bir bóligin jumsap úlgergen, qalǵan bóligin - 700 myń teńgeni politsiia tárkiledi. Qylmystyq isti tergeý kezinde JShS qyzmetkerleriniń qylmysqa qatysy bar-joǵy tekseriledi.
