Nur-Sultan ákimdiginde ótken elordany odan ary damytý máseleleri jónindegi májiliste Memleket basshysy Qasym-Jomart Toqaev qalanyń syrtqy kelbetine qatysty syn aitty, dep habarlaidy "Ult aqparat".
«Elordada qala qurylysynyń biryńǵai saiasaty joq. Bul birqatar aýdanda retsiz, beibereket qurylystarǵa alyp keledi. Kósheler men ǵimarattardy rásimdeýdiń biryńǵai úilesimdi stili joq. Sizder elordany kórý úshin arnaiy kelgen týristerdiń pikirlerin estigen de shyǵarsyzdar. Tolyqtai alǵanda, olar árine, oń pikirler. Biraq, qalada eklektikanyń da joqtyǵyn atap ótedi», - dedi QR Prezidenti.
Memleket basshysynyń paiymynsha, mundai nysandarda jailylyq bolmaidy.
«Bir ǵimarat bir stilde, ekinshisi basqa stilde salynǵan. Eń bastysy, jailylyq joq. Plitalary ushyp, asfalt jarylyp jatyr. Jasyl óskin az. Jalpy, qalany qadaǵalap, kútip ustamaityndai sezim qalyptasady. Qojaiyny joq», - dedi Q.Toqaev.
Prezident bul máseleni Elbasy Nursultan Nazarbaev ta birneshe márte aitqanyn eske saldy.
«Alystan sáýletti ǵimarat jaman kórinbeidi. Al jaqyn kelip qarasań, «sharshap» qalǵany kórinip turady. Qojaiyn kerek. Eń aldymen, aýdan ákimderi qojaiyn bolýy tiis. Olar kabinette otyrmai jaiaý júrip, turǵyndaryn, árbir ǵimarattyń tynys-tirshiligin, belgili bir ǵimaratta turyp jatqan adamdardyń ómirin bilýi qajet. Kabinette keshki saǵat 6-7-den keiin qajetti qujattarǵa qol qoiý úshin otyrýǵa bolady. Kesh bolmai turǵanda qala kósheleri men ǵimarattaryn rásimdeýdiń biryńǵai dizain-kodyn ázirleýdi tapsyramyn. Bul - meniń ákimdikke qatań tapsyrmam», - dedi Memleket basshysy.
