Elordada inkassator ishinde aqsha bar kassetany terminal janynda qaldyryp ketken, dep habarlaidy QazAqparat.
Nur-Sultan qalalyq Politsiia departamentiniń málimetinshe, saǵat shamamen 09:40-ta «Shapaǵat» saýda úiiniń janynan ótip bara jatqan qala turǵyny kóshe boiyndaǵy «RTVM terminalynyń» janynda jatqan plastmassa keisti baiqaǵan. Ol birden 102 operatoryna qońyraý shalyp, oqiǵa ornyna politsiia qyzmetkerleri jetken.
«Ishinde 290 myń teńge aqsha qarajaty bar kassetany «City Transportation Systems» JShS-niń qyzmetkeri alańǵasarlyǵynan umytyp ketken. Tabylǵan zat politsiiaǵa jetkizilip, keiinirek kólik kompaniiasyna tabystaldy. Elordanyń Politsiia departamentiniń basshylyǵy qala turǵynyna adaldyǵy ári belsendi azamattyq ustanymy úshin rizashylyq bildirdi», - delingen vedomstvo aqparatynda.
