Elordada Qazaqstan Respýblikasy Úkimetiniń «Daryn» Memlekettik jastar syilyǵynyń laýreattaryn saltanatty marapattaý rásimi ótti, dep habarlaidy QazAqparat.
«Daryn» memlekettik jastar syilyǵy jemisti ǵylymi, shyǵarmashylyq, qoǵamdyq jumystaryna, sondai-aq joǵary sporttyq jetistikterine daryndy jastardy memlekettik qoldaý maqsatynda jyl saiyn taǵaiyndalady.
Laýreattarǵa marapattardy Qazaqstan Respýblikasy Premer-ministriniń orynbasary Berdibek Saparbaev, Aqparat jáne qoǵamdyq damý ministri Dáýren Abaev, Bilim jáne ǵylym ministri Ashat Aimaǵambetov, Eńbek jáne halyqty áleýmettik qorǵaý ministri Birjan Nurymbetov, Qazaqstan Respýblikasy Parlamenti Májilisiniń depýtattary Nurlan Álimjanov pen Olga Shishigina jáne basqa da kórnekti mádeniet, jýrnalistika jáne óner qairatkerleri tabystady.
«Memlekettiń bolashaǵy, úmiti – jastar. 28 jyl ishinde Qazaqstandaǵy jastarǵa qandai jaqsylyq, jaǵdai jasalǵanyn kúndelikti ómirden, baspasózden jaqsy bilesizder. Elimizdiń Tuńǵysh prezidenti Nursultan Ábishuly biylǵy jyldy «Jastar jyly» dep ataýy bekerden beker emes. Biyldyń ózinde 2 mln-ǵa jýyq jas memlekettiń qoldaýyna ie bolyp otyr. Jol kartasy boiynsha 500 mlrd teńge jastarǵa shákirtaqy, grant, jataqhana, nesie berýge arnaldy. Memleket basshysy Qasym-Jomart Kemeluly osy Jastar jylyn ary qarai jalǵastyrý úshin kelesi jyldy «Eriktiler jyly» dep atady», - dedi QR Premer-Ministriniń orynbasary Berdibek Saparbaev «Áleýmettik qyzmet» nominatsiiasyndaǵy jeńimpazdardy quttyqtaý barysynda.
«Daryn» syilyǵy 10 nominatsiia boiynsha beriledi.
«Qoǵamdyq qyzmet» nominatsiiasy boiynsha «Qazaqstan Respýblikasynyń etnosport assotsiatsiiasynyń» bas hatshysy Nursultan Ibragimov, «Qazaqstan stýdentter Aliansy» Respýblikalyq stýdentter qozǵalysy» QB prezidenti Iliias Tústikbaev jeńimpaz atandy.
«Jýrnalistika» nominatsiiasy boiynsha marapatty birqatar derekti dokýmentaldy filmderdiń avtory Myrzabek Túsipov, jýrnalister arasyndaǵy respýblikalyq baiqaýlardyń júldegeri Aibek Tasqaliev aldy.
«Ǵylym» nominatsiiasy boiynsha ǵalym fizikter-ónertapqyshtar Nurlan Qanat jáne Erasyl Erlanuly marapattaldy.
«Teatr jáne kino» nominatsiiasy boiynsha M. Áýezov atyndaǵy Memlekettik akademiialyq drama teatry akteri Ótepbergen Aian, Q. Qýanyshbaev qazaq mýzykalyq-drama teatrynyń aktrisasy Altyngúl Erbolqyzy marapattaldy.
«Sport» nominatsiiasy boiynsha Tórt qurlyq chempionatynyń kúmis júldegeri, mánerlep syrǵanaýdan 2019-qysqy Ýniversiadanyń kúmis júldegeri Elizabet Tursynbaeva, Álem chempionatynyń eki dúrkin kúmis júldegeri (2017, 2019), Aziia chempionatynyń eki dúrkin kúmis júldegeri (2017, 2019), Qazaqstan Respýblikasy quramasynyń kapitany Qamshybek Qońqabaev marapattaldy.
«Klassikalyq mýzyka» nominatsiiasy boiynsha túrli mýzykalyq baiqaýlardyń birneshe márte laýreattary, kompozitorlar Danara Musahan jáne Ázimbek Qaldybekuly Jambaev marapattaldy.
«Halyq shyǵarmashylyǵy» nominatsiiasy boiynsha aitysker Sultanhan Meiirbek, Ǵ.Qurmanǵaliev atyndaǵy oblystyq filarmoniiasy» memlekettik kommýnaldyq qazynalyq kásipornynyń ártisi, dirijeri Jaras Satybaldiev marapattaldy.
«Ádebiet» nominatsiiasy boiynsha óleńderi túrik, ázirbaijan, ispan jáne basqa tilderge aýdarylǵan aqyn – Jadyra Baibulanova, poeziia konkýrstarynyń jeńimpazy, birqatar kitaptardy qazaq tiline aýdarýshy avtor Bekzat Smaǵulov marapattaldy.
«Dizain jáne beineleý óneri» nominatsiiasy boiynsha bas dizainer, «JÚZBAI DIZAIN» direktory, Qazaq sán qaýymdastyǵyny prezidenti Aijan Júzbai, músinshi skýlptor Músirep Syrym marapattaldy.
«Estrada» nominatsiiasy boiynsha «Slavian bazar – 2019» halyqaralyq festivaliniń Gran-pri iegeri Ádilhan Makin, «Qazaqkontsert» memlekettik kontserttik uiymynyń solisti, konferanse Marat Tórehanuly Áitimbai marapattaldy.
Syilyqqa 29 jasqa deiingi Qazaqstan Respýblikasynyń azamattary halyqaralyq jáne respýblikalyq baiqaýlardyń, festivaldar men kórmelerdiń laýreattary, respýblikalyq jáne halyqaralyq deńgeidegi sporttyq jarystardyń jeńimpazdary men júldegerleri, sonymen qatar qyzmeti innovatsiialy, tiisti salanyń jáne tutas qoǵamnyń damýyna yqpal etetin azamattar úmitker bola alady.
2017 jyldan bastap Qoǵamdyq damý ministrliktiń bastamasymen syilyq jyl saiyn beriledi. 2018 jyly syilyq kólemin úsh esege ulǵaitý máselesi sheshilip, ár nominatsiia boiynsha syilyq kólemi 600 myń teńge boldy.
Aita keteiik, úmitkerlerdiń ótinimderi 2019 jylǵy 16 mamyrdan 10 tamyzǵa deiin qabyldandy. Ótinimderdi konkýrstyq komissiia qarady. Komissiia quramyna belgili mádeniet jáne óner qairatkerleri, ǵalymdar, jazýshylar, parlament depýtattary men qoǵam qairatkerleri kirgen.
