Keshe elordada 8-qabattaǵy terezeden salbyrap turǵan balany qutqarýǵa qatysqan Saǵi Jylqyshievke 2 bólmeli páterdiń sertifikaty tabys etildi, dep habarlaidy QazAqparat.
«Páterdiń sertifikatyn aldym. Úi áli bitpegen. Sol úshin búgin sertifikat tapsyrdy. Páterdi Alla qalasa alamyz», - dep qýanyshymen bólisti Saǵi Jylqyshiev.
GBG qurylys kompaniiasynyń komfort+ sanattaǵy turǵyn úiiniń qurylysy kelesi jyly aiaqtalady. Turǵyn úi qurylysyna memlekettiń kepildigi bar.
Aita keteiik, keshe tańerteń elordada ýaqytsha turyp jatqan Qyzylorda turǵyny 8-qabatta terezeden salbyrap turǵan búldirshindi qutqaryp qaldy. Bul oqiǵanyń videosy jelide keń taralyp, Sábit Shontaqbaevtyń batyl áreketine kópshilik tánti boldy. QR Tótenshe jaǵdailar birinshi vitse-ministri Ibragim Kúlshimbaev azamatty «Tótenshe jaǵdaidaǵy erligi úshin» tósbelgisimen marapattasa, Nur-Sultan ákimi Altai Kólginov jeke qabyldap, onyń Lokomotiv zaýytyna jumysqa ornalastyrylatynyn aitty.
Al «G-park» qurylys kompaniiasy oǵan úsh bólmeli páter syiǵa tartty.
Keiinnen Sábitke kishkentai qyzdy qutqarýǵa Saǵi esimdi jigittiń kómek kórsetkeni belgili bolyp, áleýmettik jeli qoldanýshylary oǵan da páter berý kerektigin jazǵan edi. Kóptiń qalaýy oryndalyp, endi búgin Saǵi da baspana kiltin alyp otyr.
