14-15 mamyr kúnderi Q.Qýanyshbaev atyndaǵy memlekettik akademiialyq qazaq mýzykalyq-drama teatry «Bopai hanym» tarihi tragediiasyn kórermen nazaryna usynady, dep habarlaidy "Ult aqparat" teatrdyń baspasóz qyzmetine silteme jasap.
Týyndy avtory – Abai atyndaǵy memlekettik syilyqtyń laýreaty Roza Muqanova. Rejisseri – Juldyzbek Jumanbai.
«Bopai hanym – Ábilqaiyrdyń jary, qiyn kúnderde el tynyshtyǵy men birligi úshin pende basyndaǵy qaiǵyny da, aýyrtpalyq pen alaýyzdyqty jeńe bilgen kóregen qazaq áieli. Bopaidyń qairatkerlik tulǵasy, asyl ana retinde tárbielik ónegesi – ultqa maqtanysh, urpaqqa úlgi. Bopai hanym beinesin birinshi quramda teatr jáne kino maitalmany, Qazaqstannyń eńbek sińirgen qairatkeri, professor, «Qurmet», «Parasat» ordenderiniń iegeri Leilo Beknazar-Haninga somdaidy», - delingen teatr habarlamasynda.
Sonymen birge, premera aldynda Leilo Aqnazarqyzynyń sahna jáne kinodaǵy 40 jyldyq shyǵarmashylyǵyna arnalǵan «Juldyzym meniń joǵary» kitabynyń tusaýy kesiledi.
Premeranyń ekinshi kúni Bopai rólinde Qazaqstan Jastar Odaǵy «Serper» syilyǵynyń laýreaty Saia Toqmanǵalieva oinaidy.
Al Ábilqaiyr han rólin birinshi quramda Erjan Nurymbet, ekinshi quramda – Qazaqstannyń eńbek sińirgen qairatkeri Syrym Qashqabaev, Nuráli handy – Qazaqstan Jastar Odaǵy «Serper» syilyǵynyń laýreaty Janat Ospanov jáne Bázil Sultanǵazy, Baraq Sultan rólin – Qazaqstannyń eńbek sińirgen qairatkerleri Qýandyq Qystyqbai men Janqaldybek Tólenbaev somdaidy.
