Búgin elordadaǵy «Ámir» ámbebap bazary aýmaǵynda órt boldy. Bul týraly Nur-Sultan qalalyq tótenshe jaǵdailar departamentinen málim etti, dep habarlaidy "Ult aqparat".
«Búgin saǵat 16-14-te Nur-Sultan qalalyq TJD órt sóndirý bólimshesine Alash tas joly 29/2 mekenjaiynan shaqyrtý tústi. Oqiǵa ornyna barǵan kezde «Ámir« ámbebap bazarynda boljamdy aýmaǵy 300 sharshy metr bolatyn qoima ǵimaratynyń shatyry órtenip jatqany anyqtaldy», - dep atap ótedi vedomstvodan.
Órt sóndirýshiler saǵat 17-08-de jalynnyń betin qaitardy. Qazirgi ýaqytta órtti tolyqtai sóndirý jumystary júrgizilip jatyr. Tilsiz jaýmen kúreske órt sóndirý qyzmetiniń 32 mamany men 10 tehnikasy jumyldyrylǵan.
«Qaza tapqandar men zardap shekkender joq», - dep naqtylady departamentten.
