Eki márte Keńes Odaǵynyń Batyry Talǵat Bigeldinovtiń týǵanyna 99 jyl tolý qurmetine Nur-Sultan qalasynda dańqty ushqyshtyń eskertkishine gúl shoqtaryn qoiý rásimi ótti. Bul týraly Qorǵanys ministrliginiń baspasóz qyzmeti habarlady.
Oǵan Halyq Qaharmany armiia generaly Muhtar Altynbaev, Áýe qorǵanysy kúshteriniń bas qolbasshysy aviatsiia general-leitenanty Nurlan Ormanbetov, Qazaqstan áskeri-áýe kúshteriniń ardagerleri men ofitserleri qatysty.
– Búgin biz Talǵat Jaqypbekulynyń erligine taǵzym etip, qurmet kórsetý úshin jinalyp otyrmyz. Laiyqty izbasarlardy, táýelsiz Qazaqstannyń áskeri ushqyshtaryn, Otan qorǵaýshylaryn daiarlaityn Áýe qorǵanysy kúshteriniń áskeri institýty batyrdyń esimin maqtanyshpen alyp júr. Bizdiń júregimizde dańqty batyr týraly jarqyn estelikter máńgi saqtalady. Batyrdyń «Oqyńyz. Úirenińiz. Jan-táni saý myqty azamat bolyńyz. Ózińizdi qiyndyqqa tóze bilýge úiretińiz. Kez kelgen jaǵdaida, kez kelgen qiyndyqta rýhy myqty adam ǵana jeńimpaz bolady. Aǵa býynnyń jaýyngerlik dástúrlerin, eńbekqorlyǵyn ustanatyn adal murageri bolyńyz» degen ósietin árqashan ustanamyz, – dedi aviatsiia general-leitenanty Nurlan Ormanbetov.
Talǵat Bigeldinov Balashovskii aviatsiialyq ýchilishesiniń kýrsantynan bastap birinshi Ýkraina maidany quramyndaǵy 144-shi gvardiialyq aviatsiialyq polktiń eskadrilia komandirine deiingi eńbek jolynan júrip ótti.
Soǵys kezinde ol Il-2 shabýyldaýshy ushaǵynda 305 ret ushyp, batyrlyq, ushýda sheberlik tanytyp, eń jaýapty tapsyrmalardy sátti oryndady. Talǵat Bigeldinov erligi úshin Lenin, Qyzyl Tý, Aleksandr Nevskii, Qyzyl Juldyz, III dárejeli Dańq, I jáne II dárejeli Otan soǵysy ordenderimen nagradtaldy, eki ret Keńes Odaǵynyń Batyry ataǵyna ie boldy.
Soǵystan keiingi jyldary Talǵat Bigeldinov áskeri jáne azamattyq aviatsiiada qyzmet etip, qoǵamdyq jumyspen ainalysty.
Talǵat Jaqypbekuly Bigeldinov 2014 jylǵy 10 qarashada qaitys boldy.
