Elordada «Ashyq» jobasyna qatyspaityn kafeler, meiramhanalar men basqa da ShOB nysandarynyń jumys ýaqyty 20:00-ge deiin qysqartylýy múmkin. Al jobaǵa qatysýshylar aptanyń kez kelgen kúni 00:00-ge deiin jumys istei alady, dep habarlaidy "Ult aqparat" qala ákimdiginiń resmi saityna silteme jasap.
Nur-Sultannyń bas memlekettik sanitarlyq dárigeri Sarhat Beisenovanyń aitýynsha, «Ashyq» pilottyq jobasynyń negizgi maqsaty — kelýshiler men qyzmetkerlerdiń qaýipsizdigin qamtamasyz etý. Jurt qoǵamdyq oryndarǵa barýy sebepti ózin-ózi oqshaýlaý rejimin saqtamaidy. Osylaisha virýstyń taralýy múmkin faktilermen jii kúresýge týra keledi. Iaǵni, «Ashyq» jobasy adamnyń mekemege kirgen kezde onyń mártebesin kórýine múmkindik beredi: bailanysta bolǵan, COVID-19 úshin teris nemese oń test.
Sondai-aq, «Ashyq» jobasy karantin kezeńinde qyzmetin qaita bastai almaǵan kásipkerlerge túrli jeńildiktermen birtindep nemese tolyq jumys isteýine múmkindik beredi.
«Bul joba koronavirýstyń taralýyn boldyrmaýǵa kómektesedi. Sebebi ol kelýshiler men qyzmetkerlerdi qaýipti indetten qorǵaidy. Qaýipsiz jobanyń arqasynda kinoteatrlar, fitnes-klýbtar, basseinder, teatrlar siiaqty kóptegen nysandar jumysyn qaita bastady. «Ashyq« júiesi boiynsha jumys isteitin biznes nysandary barlyq kúnderi 00:00-ge deiin jumys istei alady. Al ózgelerine — 22:00-ge deiin ári demalys kúnderi jumys isteýine tyiym salynǵan. Eger olar óz qyzmetkerleri men kelýshileriniń qaýipsizdigi týraly oilamasa, olardyń jumys ýaqytyn 20:00-ge deiin qysqartýǵa májbúr bolamyz», — dedi elordanyń bas memlekettik sanitarlyq dárigeri Sarhat Beisenova.
Úkimet otyrysynda «Ashyq» jobasy boiynsha qyzmetin qaita bastaǵan «Astana Balet» jáne «Astana Opera» teatrlary jobanyń qaýipsiz jáne tiimdi jumysynyń úlgili mysaldary bolyp sanalatyny aityldy. Bul teatrlardyń jumys tájiribesin óńirlerge keńeitý qajet.
Esterińizge sala keteiik, qoǵamdyq mekemege kirer aldynda paidalanýshy arnaiy QR-kodty skanerleidi jáne ony kireberistegi ákimshige usynady. Kod kelýshiniń mártebesin anyqtaidy. Ár túske sáikes mártebe kelesidei maǵyna beredi:
«Qyzyl» mártebe — PTR-test tapsyryp, koronavirýs anyqtalǵan adamǵa beriledi. Mundai mártebe ieleri úide oqshaýlaný rejimin qatań saqtaýy tiis.
«Sary» – bailanysta bolǵan adamdarǵa beriletin mártebe. Olarǵa azyq-túlik alýǵa nemese úidiń janyndaǵy dárihanaǵa barýǵa ruqsat etilgenmen, basqa qoǵamdyq oryndarǵa barýyna tyiym salynady.
«Kók» — aýrý juqtyrǵan adamdarmen bailanysta bolǵan adamdar esebinde joq, PTR-test (mysaly áýejaida) talap etiletin jerlerden basqa kez kelgen orynda erkin qozǵalý degendi bildiredi.
«Jasyl» – júrip-turýynda shekteý joǵyn bildiredi, mundai adam bazada COVID-19 indetine PTR-testileýi teris nátije kórsetken paidalanýshy bolyp sanalady.
