Qazaqstan Ulttyq tarihshylar kongresiniń VIII otyrysynda Abai interaktivti kesheniniń tusaýy kesildi, dep habarlaidy "Ult aqparat".
Otyrys barysynda Abai interaktivti kesheniniń tusaýy kesildi. Keshendi QR Bilim jáne ǵylym ministrligi ǵylym komitetiniń tapsyrysymen L.Gýmilev atyndaǵy Eýraziia ulttyq ýniversitetiniń Abai akademiiasy ǵylymi-zertteý institýty ázirledi.
«Bul keshen birneshe bólimnen turady. Eń alǵashqy bólim – Abai tuǵyrnamasy. Aqyn zamandastary men urpaqtarynyń estelikteri, abaitanýshy ǵalymdardyń akademiialyq zertteýleri osynda tolyǵymen jinaqtalǵan. Ekinshi bólim – Abaidyń shyǵarmashylyq álemi. Aqyn óleńderi men qara sózderiniń, poemalary men aýdarmalarynyń árqaisy jeke-jeke annotatsiialyq sipatta taldanǵan jáne ár týyndynyń tolyq mátini aýdionusqa túrinde berilgen», - deidi Abai akademiiasy ǵylymi-zertteý institýtynyń direktory Erlan Sailaýbai.
Atalǵan keshende oqyrman Abai qara sózderiniń shyǵý tarihymen tanysyp, aýdionusqada tyńdai alady.
«Kelesi taraý – beinedárister. Bul taraýda Abaidyń ómirbaiany men shyǵarmashylyq murasyn jańasha baiandaý maqsatynda tanymdyq akademiialyq dárister toptamasy berilgen. Dáristi abaitanýshy ǵalymdar oqydy. Sonymen qatar, keshende onlain kitaphana bar. Onlain kitaphananyń ereksheligi – aqyn shyǵarmashylyǵy týraly barlyq zertteý, ǵylymi-tanymdyq kitaptar tsifrlyq formatta tolyq mátinde qoiylǵan. Oqyrman ózi qalaǵan zertteýshisiniń eńbekterin oqyp, tolyq tanysa alady. Keshenniń taǵy bir bóligi – Jidebai-Bórili dep atalady. Onda Abaidyń Jidebai-Bórili memlekettik tarihi-mádeni jáne ádebi-memorialdyq qoryq-mýzeiiniń quramyna kiretin Semeidegi bas murajaiy, «Alash arystary – M.Áýezov» murajaiy, Jidebaidaǵy Abaidyń murajai-úii, Shákárim murajaiynyń foto-beinenusqalary ornalasqan. Keshenniń taǵy bir mazmundy, maǵynaly bólimi – 20 poeziia bólimi dep atalady. Munda Abai óleńderi negizinde 15 arnaiy qoiylym túsirilgen. Qoiylymnyń ereksheligi – kásibi akterler Abai shyǵarmashylyǵynyń mazmunyna sáikes tamasha qoiylymdar oinap shyqty», - deidi ol.
Atalǵan shara Ábý Nasyr ál-Farabidiń 1150 jyldyq, Abaidyń 175 jyldyq mereitoiy jáne «Ulyq Ulys» – Altyn Ordanyń 750 jyldyǵyna orai ótti.
