Qasym-Jomart Toqaev Nur-Sultan qalasynyń ákimi Altai Kólginovti qabyldady, dep habarlaidy "Ult aqparat" Aqordaǵa silteme jasap.
Memleket basshysyna áleýmettik álsiz toptardy qoldaý maqsatynda ashylǵan «Januia» ortalyǵynyń jumysy, endi salynatyn ippoterapiia jáne eki birdei ońaltý ortalyǵy jaiynda baiandaldy.
Qazaqstan Prezidentiniń úi kezeginde turǵan azamattardy, onyń ishinde az qamtylǵan otbasylardy, jumys isteitin jastardy turǵyn úimen qamtý maqsatynda qoljetimdi baspana qurylysyn arttyrý týraly tapsyrmasynyń oryndalý barysy jaiynda esep berildi.
Elorda ákimi úleskerlik problemaly qurylystar jaiy, qala shetindegi aýyl-aimaqtardy damytý máselesi aldaǵy 3 jyldyq biýdjette qarastyrylǵanyn atap ótip, qalany gazben qamtý boiynsha atqarylyp jatqan jumystar týraly jetkizdi.
Qalany abattandyrý boiynsha esepten belgili bolǵandai, eski alańnyń aýmaǵynan bastap shahardyń eki jaǵyn qosatyn jaiaý júrginshilerge yńǵaily jol tóseledi. Jalpy jaiaý júrginshilerge yńǵaily 80 shaqyrym jol tóselip, aldaǵy 3 jylda 100 shaqyrymnan astam velojol salynady.
Sýmen qamtý jumystaryn jetildirý úshin atqarylatyn sharalar týraly da aityldy.
Qala ákimi sharýashylyqpen qatar megapolistiń mádeni ómiri boiynsha da josparlarmen bólisti. Nur-Sultan qalasynda Uly Abaidyń 175 jyldyǵyna orai «Abai álemi» ortalyǵy boi kóteredi. Sonymen qatar Sáken Seifýllin, Beiimbet Mailin jáne Iliias Jansúgirovtiń 125 jyldyq mereitoilaryna bailanysty qoladan quiylǵan «Úsh arys» eskertkishi ornatylady.
Memleket basshysy qalany odan ári damytý boiynsha birqatar naqty tapsyrmalar berdi.
