Elordada kinoteatrlar Ashyq jobasyna qatysý arqyly jumys kúnderi, sondai-aq demalys kúnderi jumys isteýge múmkindik aldy. Bul jaiynda Nur-Sultan qalalyq kásipkerler palatasynan málim etti, dep habarlaidy "Ult aqparat".
Palata málimetinshe, osy aptada «Asia Park» saýda jáne oiyn-saýyq ortalyǵynda ornalasqan «Arman» kinoteatry, «Arýjan» saýda jáne oiyn-saýyq ortalyǵyndaǵy «ARU Cinema» kinoteatry, «Saryarqa», «Kerýen» jáne «Keruen City» saýda jáne oiyn-saýyq ortalyqtaryndaǵy «Kinopark» kinotearlar jelisi, «TALAN GALLERY» nysanyndaǵy «KERUEN CINEMA» kinoteatry kórermenge óz esikterin aiqara ashty. Sonymen qatar «Movie Room» jumysyn jandandyrdy. Ótken aptada jobaǵa Chaplin kinotetarlar jelisi de qosyldy.
«Kinoteatrlar qajetti tirkeý jáne nusqaýlardan ótip, QR-kod aldy. Endi sanitar dáriger jazǵan qaýipsizdik sharalaryn saqtap, apta boiy jumys isteýge múmkindik aldy. Mindetti talaptar qatarynda – kelýshilerdi ár eki oryndyq saiyn shahmat tártibinde otyrǵyzý bar, jalpy tolymdylyq 30 paiyzdan aspaýy tiis. Sonymen qatar maska kiiý – kelýshiler men personalǵa qoiylǵan mindetti talap. Nysandar ishinde sanitarlyq óńdeý júrgizilip otyrýy kerek», – dedi Nur-Sultan qalasy óńirlik kásipkerler palatasy direktorynyń orynbasary Qýanyshbek Muqash.
«Arman» kinoteatrynyń ókili Kamila Bashpanova ár jańashyldyq sekildi jobany qoldanýda biraz suraq baryn aitty. Alaida, kinoteatr qyzmetkerleri kómegimen kelýshiler qosymsha talaptaryn tez igerip jatyr.
«Ákimshilerimiz qonaqtarǵa qosymshany júkteýge kómektesip, qosymshaǵa qalai tirkelip, qoldaný qajettigin túsindirip jatyr. Kinoteatr ishinde qosymshany qoldanýǵa qatysty nusqamalar ilingen. Jalpy alǵanda, adamdar jańashyldyqqa tez beiimdelip, saqtyq sharalaryn qoldanýǵa daiyn», – deidi ol.
Eske salsaq, Nur-Sultan qalasynda synaq rejiminde Ashyq jobasy 2021 jyldyń 17 qańtarynda iske qosyldy. 2021 jyldyń 26 aqpanynda Bas sanitar dárigerdiń «Ashyq» mobildi qosymshasyn Nur-Sultan, Almaty jáne Qaraǵandy qalalaryndaǵy kásipkerlik nysandaryna engizý boiynsha pilottyq is-shara ótkizý týraly» №7 qaýlysy qabyldandy.
Osy qaýly aiasynda «Ashyq» pilottyq jobasy fitnes-klýbtar, spa-ortalyqtar, saýnalar, basseinder, kompiýter klýbtary jáne boýling ortalyqtarynda iske asyryla bastady. Osylaisha, 2020 jyldyń naýryzynan bastap toqtap qalǵan kompiýter klýbtar men boiling ortalyqtary jumys isteýde.
«Qazirgi kezde joba el aýqymynda taratylýǵa múmkindik aldy. Joǵaryda atalǵan kásipkerlik nysandarynan bólek, jobaǵa kinoteatrlar, qoǵamdyq tamaqtaný nysandary, karaoke jáne banket zaldary, teatrlar, kontsert zaldary qatysa alady. Qazirgi tańda astanada «Ashyq» jobasyna barlyǵy 135 ShOB sýbektisi qatysyp jatyr», – dedi Nur-Sultan qalasy óńirlik kásipkerler palatasynyń direktory Almat Júnisov
