Elordanyń kóshi-qon politsiiasy qyzmetkerleri jyl basynan beri jedel aldyn alý sharalaryn ótkizip, 600-ge jýyq «rezeńke» mekenjaidy anyqtady, dep habarlaidy "Ult aqparat".
Nur-Sultan qalalyq Politsiia departamentiniń baspasóz qyzmetiniń málimetinshe, tirkelgen mekenjaida is júzinde turmaityn 24 myńǵa jýyq azamat tirkeýden shyǵaryldy. Olardyń ishinde ákimshilik ǵimarattarǵa tirkelgen azamattar bar. Al kóshi-qon zańnamasyn buzǵan turǵyn úilerdiń ielerine aiyppul salyndy.
«Aitalyq, kóshi-qon qyzmeti qyzmetkerleri K.Ázerbaev kóshesindegi úilerdiń birinde 2016 jyldan beri 259 adam turaqty tirkeýge turǵan páterdi anyqtady. Dál osy páterde 289 adam ýaqytsha tirkeýge alynǵan. Buǵan qosa, osy jyldyń tamyzynda ǵana «pysyq áiel» páterine 154 adamdy turaqty tirkeýge qoiǵan. Páter iesine qatysty QR Ákimshilik quqyq bzýshylyq kodeksiniń 493-babymen ákimshilik hattama toltyryldy. Otbasynyń 4 múshesinen basqa buǵan deiin tirkeýge alynǵan adamdardyń barlyǵy tirkeýden shyǵaryldy», - dedi vedomstvodan.
Osyǵan orai Nur-Sultan qalalyq PD kóshi-qon qyzmeti kóshi-qon zańnamasynyń buzylýynyń aldyn alý maqsatynda turǵyndarǵa turǵylyqty jerlerine der ýaqytynda tirkelýge shaqyrady. Mekenjai málimetterinde qaishylyq bolǵan kezde HQKO-lardaǵy kóshi-qon qyzmetiniń aýmaqtyq bólimshelerine júginý qajet.
Jalpy, 2020 jyldyń 9 aiynda elordada 121 myńnan astam turaqty jáne 30 myńǵa jýyq adam ýaqytsha tirkeýge turdy. Statistikalyq derekterge sáikes, sońǵy 2 jylda Aqmola, Túrkistan, Qaraǵandy jáne Shyǵys Qazaqstan oblystarynyń turǵyndary elorda jii qonys aýdaratyndyǵy baiqalady.
