Elordada qytai tarihshysy Sý Beihaidyń «Qazaqtyń jalpy tarihy» atty 4 tomdyq eńbeginiń qazaqsha basylymynyń tusaýkeseri ótti, dep habarlaidy "Ult aqparat" QR Ulttyq akademiialyq kitaphananyń Instagram paraqshasyna silteme jasap.
Tusaýkeser rásimin L.N.Gýmilev atyndaǵy Eýraziia ulttyq ýniversitetiniń prorektory, filologiia ǵylymdarynyń doktory, akademik Dihan Qamzabekuly basqardy.
Saltanatty rásimge belgili tarihshy, Qazaq Bilim akademiiasynyń akademigi Búrkitbai Aiaǵan, etnograf-ǵalym Aqedil Toishanuly, belgili túrkolog, filologiia ǵylymdarynyń doktory Qarjaýbai Sartqojauly, túrkitanýshy ǵalym Nápil Bazylhan jáne basqa da ziialy qaýym ókilderi qatysty.
Tórt tomnan turatyn irgeli eńbektiń avtory qytai tarihshysy Sý Beihai, al qazaq tiline aýdarǵan L.N. Gýmilev atyndaǵy Eýraziia ulttyq ýniversitetiniń Shyǵystaný kafedrasynyń professory Tursynhan Zákenuly.
Zertteý jumysy qazaq halqynyń erte zamannan XX ǵasyrdyń alǵashqy jartysyna deiingi tarihyn tórt kezeńge bólip qarastyrǵan. Kitapta jazýshy qazaq etnogenezi men memlekettiliginiń negizin bizdiń dáýirimizge deiingi Saq, Úisin zamanynan bastap, Túrgesh qaǵanatyn Qazaq jerin eń alǵash biriktirgen qaǵanat (memleket) retinde qarastyrady. Eńbekte qazaq tarihynyń hronologiialyq sheńberi keńeitilip, mazmuny barynsha baiytylǵan.
Sharanyń shymyldyǵyn ashqan Dihan Qamzabekuly «Qazaqtyń jalpy tarihy» aýdarma eńbeginiń táýelsizdik jyldary qazaq tarihy zertteý jumysyndaǵy aýyz toltyryp aitarlyqtai iri eńbek ekenin aitty.
«Prezident Qasym-Jomart Toqaev osydan 15 jyl buryn elimizdiń syrtqy ister ministri bolyp turǵan kezinde Tursynhan Zákenulyna arnaiy hat jazyp, Sý Beihaidyń eńbegin qazaq oqyrmandaryna jetkizý týraly aitqan. Búgingi kúni, osy eńbek ǵylymi jobanyń aiasynda oqyrmanǵa jol tartyp otyr»-,dedi Dihan Qamzabekuly.
Aita ktetiik, «Qazaqtyń jalpy tarihy» qazaq tiline aýdarylyp basylyp shyqqannan keiin, Prezident Toqaev Tursynhan Zákenulyna quttyqtaý hatyn joldady.
