Elordada 2 myń adamnyń qatysýymen utys oiynyn ótkizgen kásipkerler qala turǵyndarynan keshirim surady, dep habarlaidy "Ult aqparat".
Nur-Sultan ákimdigi resmi saitynyń málimetine sensek, 7 aqpanda qalada eki myń adamnyń qatysýymen jappai is-shara ótkizýdiń joly kesilgen.
Jańa filialdyń ashylýyna orai «Romantic» gúlder ortalyǵy lotereia utys oiynyn ótkizgen bolatyn.
Jappai is-shara Máńgilik el dańǵylynda uiymdastyryldy. Saldarynan adam kóp jinalǵandyqtan keptelis paida boldy.
Al qatysýshylar maska rejimin, áleýmettik qashyqtyqty saqtamai, virýstyń taralý qaýpin arttyrdy.
Buqaralyq is-sharany ótkizgen uiymdastyrýshylar qala turǵyndarynan beineótinish túrinde keltirilgen zalal úshin keshirim surady.
«Romantic» gúlder ortalyǵy Nur-Sultan qalasynyń turǵyndarynan keshirim suraidy. Bolǵan oqiǵa úshin barlyq jaýapkershilikti óz moinymyzǵa alamyz. Is-shara ótkizý úshin qoiylatyn talaptar men bas sanitarlyq dárigerdiń nusqamasy buzyldy. Qalamyzǵa jáne jurtshylyqqa keltirilgen qolaisyzdyqtar úshin jaýapkershilikti kóterýge daiynbyz. Bul is-shara ákimdiktiń jáne basqa da memlekettik organdardyń kelisiminsiz ótkizildi. Qala turǵyndary aldynda keshirim suraimyz. Biz qalyptasqan jaǵdaidyń aýyrlyǵyn túsinbedik«, - deidi gúl ortalyǵynyń atqarýshy direktory Temirlan Kenjebaev.
Eske sala keteiik, dúken ieleri QR ÁQBtK 425-babynyń birinshi bóligi boiynsha ákimshilik jaýapkershilikke tartyldy, olarǵa 230 AEK nemese 670 910 teńge mólsherinde aiyppul salyndy.
Kásipkerler kinásin moiyndap, aiyppuldy 7 kún ishinde óteýge keliskendikten, tólem mólsheri 115 AEK nemese 335 455 teńge bolmaq.
7 aqpanda jumys rejimin buzǵany úshin «Zarechnyi» monshasy, «Opus One» karaoke-meiramhanasy jáne «Time to smoke» laýndj bary da jaýapkershilikke tartyldy.
