Politseiler elordada karantin rejimin buzǵan 18 nysandy anyqtady. Materialdar is júrgizý sheshimin qabyldaý úshin taýarlar men kórsetilgen qyzmetterdiń sapasy men qaýipsizdigin baqylaý basqarmasyna jiberildi, dep habarlaidy qala ákimdiginiń resmi saity.
Ótken táýlikte Nur-Sultanda karantin rejimin buzǵan 18 kásipkerlik sýbekt anyqtaldy. Olardyń arasynda oiyn-saýyq, saýnalar, dúkender, loto-klýb, kalian-bar jáne kólik jýý oryndary bar. 3 tamyzda saǵat 24:00 shamasynda Saraishyq kóshesinde loto-klýb jumys istegen. Oiyn mekemesinde karantin sharalaryna qaramastan, kelýshiler utys tikken.
Sondai-aq mobildi top túngi ýaqytta Erkókshe kóshesindegi saýnada karantin rejiminiń talaptaryn elemei, bos ýaqytyn ótkizgen alty adamdy anyqtady.
Sol túni Abylai han kóshesinde kólik jýý qyzmeti jumys istegen. Ákimshi jumys ornynda bola otyryp, mashinalarǵa qyzmet kórsetýge ruqsat bergen.
Sonymen qatar tamaqtaný oryndary da tekserildi. Túngi ýaqytta jumys istegen jáne azamattardy qabyldaǵan eki kafe anyqtaldy. Kelýshiler sanitarlyq-epidemiologiialyq normalardy buzyp, ózderine jáne jaqyndaryna virýs juqtyrý qaýpin tóndirdi.
«Jinalǵan barlyq materialdar is júrgizý sheshimin qabyldaý úshin taýarlar men kórsetilgen qyzmetterdiń sapasy men qaýipsizdigin baqylaý basqarmasyna jiberildi. Politsiia, epidemiologtar, eriktiler, jergilikti atqarýshy organ ókilderinen quralǵan mobildi toptar karantin rejimin buzǵandardy anyqtaýdy jalǵastyrýda.
Tekserý barysynda politseiler oiyn-saýyq oryndaryna, qoǵamdyq tamaqtaný nysandaryna, saýnalarǵa, monshalarǵa kirip, ielerine qazirgi karantin sharalary týraly eskertedi, sondai-aq zań buzýshylyq faktilerin anyqtaidy», - delingen habarlamada.
Nur-Sultan politsiia departamenti azamattarǵa karantin sharalaryn buzǵany úshin jaýapqa tartylatyny týraly eskertedi jáne sanitarlyq normalardy saqtaýǵa shaqyrady.
