Nur-Sultan qalasy bilim basqarmasynyń basshysy Sholpan Qadyrova oqýshylardyń kúzgi kanikýlynda qandai sharalar ótetinin aityp berdi, dep habarlaidy QazAqparat.
«Taǵy bir mańyzdy taqyryp – oqýshylardyń búginnen bastap 15 qarashaǵa deiin sozylatyn kúzgi demalystaryn ótkizý. Kúzgi demalys «Qazaqstan balalary – kúzgi interaktiv» atty uranmen ótedi. Osy maqsatta ár mektepte is-sharalar jospary jasaqtaldy. Osy jospar boiynsha quqyq qorǵaý uiymdarynyń keńesteri, Qazaqstannyń JOO men kolledjderine virtýaldy saiahattar, chellendjder, tanymal sportshylarmen kezdesý, 3D modeldeý jáne robot qurastyrý boiynsha sheberlik synyptary, qoldan jasalǵan buiymdar men sýretter kórmeleri ótkiziledi», - dep atap ótti basqarma basshysy qala ákimdiginde ótken brifingte .
Karantinniń qatańdaýyna bailanysty barlyq sharalar onlain formatta ótkiziledi.
«20 qazan men 20 qarasha aralyǵynda kúzgi demalys kezinde bilim berý uiymdarynda «Bala quqyǵy – adam quqyǵy» ailyǵy ótedi. Is-sharalar birinshi kezekte oqýshylardy quqyqtyq aqparattandyrýǵa, shyǵarmashylyq jáne ziiatkerlik damytýǵa, otbasylyq qundylyqtardy nyǵaitýǵa, ómirlik qiyn jaǵdaiǵa tap bolǵan balalar men otbasylar úshin qaiyrymdylyq sharalar uiymdastyrýǵa baǵyttalǵan. Al 1 qarashada «Durys tamaqtaný mektebi» jobasy aiasynda qala mektepteriniń oqýshylary arasynda chellendj iske qosyldy. Onyń negizgi maqsaty – durys tamaqtanýdy nasihattaý. Bul jas urpaqty salaýatty jáne myqty bolyp ósýge kómektesetin jaqsy ádetter men daǵdylardy qalyptastyrýǵa kómektesedi», - deidi Sh. Qadyrova.
Áleýmettik jelilerde «Bes asyl is» qaiyrymdylyq chellendji bastaldy. Sharanyń negizi maqsaty – balalardyń jaqsylyq jasaýǵa umtylysyn oiatý.
«Sonymen birge, kúzgi demalysta qosymsha bilim berý uiymdary óz jumysyn 10 oqýshydan aspaityn kezekshi toptarda aldyn-ala jazylý boiynsha shtattyq rejimde saǵat 9-dan keshki 18:00-ge deiin, onlain rejimde – belgilengen kestege sáikes jalǵasyratynyn aitqym keledi. Al jalpy bilim berý ortalyqtarynda ornalasqan qosymsha bilim berý uiymdarynyń filialdary men kommiýniti-ortalyqtardyń jumysy karantindik sharalardyń qatańdaýyna bailanysty toqtatyldy», - dep túsindirdi Sholpan Qadyrova.
