Elorda avtobýstarynda jolaýshynyń bet-júzin taný arqyly jolaqy alý júiesi engiziledi. Bul týraly búgin «IPay» JShS quryltaishysy Almas Aimenov aitty, dep habarlaidy QazAqparat.
«Biometriianyń kómegimen bet-álpettiń sýreti arqyly tólem jasaýdy engizbekpiz. Telegram-da bot qurdyq. Onda siz ózińizdiń JSN-inińdi, sýretińizdi, avtobýs kartańyzdy tirkeý arqyly júiege ene alasyz. Odan keiin málimetterińizdi paidalanýǵa ruqsat beresiz. Munan ary telefonyńyzdy nemese tólem kartańyzdy ózińizben birge alyp júrý arqyly avtobýsta bilet satyp ala alasyz», - dedi ol «Qoǵamdyq kólik: reformalar jáne damý joldary» atty konferentsiia barysynda.
Onyń atap ótýinshe, júie barynsha qaýipsiz.
«Biz qaýipsizdik sheginiń kriteriilerin kóterdik. Júiemiz 95 paiyzǵa deiin dál tanidy. Eger júieniń taný deńgeii 80 paiyzdan tómen bolsa, onda jolaýshyǵa kameraǵa taǵy bir márte qaraý týraly ótinish jasalady. Bastapqydan-aq júie jolaqysyn tólemegen adamdardy ustaý úshin emes, jolaýshylardyń qoldanýyna yńǵaily bolýy úshin jasalǵan. Shynymen de osy júieni paidalanǵysy kelgen jolaýshy kameraǵa týra qarap, bilet ala alady», - dedi Almas Aimenov.
Kompaniia quryltaishysynyń sózine qaraǵanda, tólemniń mundai júiesin qoldaný barysynda jolaýshynyń sýreti júrgizýshi aldyndaǵy monitordan kórinip turady.
«Jalpy, bul tolyqtai qazaqstandyq ázirleme sanalady. Osyǵan uqsas júie bolýy da múmkin. Degenmen, bizdikiniń tólem jasaýǵa da múmkindigi bar», - dedi ol.
