Elorda áýejaiynda teplovizory bar smart-shlem synaqtan ótkizilýde, dep habarlaidy "Ult aqparat".
Qytaidyń KC Wearable tehnologiialyq kompaniiasy ázirlegen Kc n901 smart helmet markaly intellektýaldy shlem adamnyń dene qyzýyn birden ólsheýge múmkindik beredi. Ázirshe elorda áýejaiyna bir danasy berilgen jáne ol ilki rejimde paidalanylyp otyr.
Shlem 5 metr qashyqtyqtaǵy dene qyzýy joǵary adamdy birden anyqtap, onyń jaqyndap kele jatqanyn dabyl arqyly bildiredi.
«Onyń basty qyzmeti - termometriia, iaǵni qyzýdy ólsheý. Degenmen, smart-shlemniń ózge de qyzmetteri bar. Máselen, qyzmetkerlerdi qyzmettik kýálik arqyly jáne qyzmet kóligin tani alady. Tek onyń qyzmetin baptasa bolǵany», - deidi «Nursultan Nazarbaev halyqaralyq áýejaiy» AQ meditsinalyq pýnkti meńgerýshisi qyzmetin atqarýshy, dáriger-terapevt Ábdiǵali Shapýlatov.
Smart-shlem óziniń tiimdiligin kórsetse, aldaǵy ýaqytta onyń sany ulǵaiýy da múmkin.
«Bizden «terminalda júrgen ne qylǵan «robokop?» dep jii suraidy. Taǵy da aitamyn, bul - ilki joba. Biz álemdik tájiribeni zerdelep otyramyz jáne áýejaiymyzda synaqtan ótkizýge sheshim qabyldadyq», - deidi ol.
«Nursultan Nazarbaev halyqaralyq áýejaiy» AQ baspasóz qyzmetiniń málimetinshe, ǵimarat ishinde zalalsyzdandyrý jumysy kúsheitilip, sanitaizerler sany artqan.
Sonymen qatar, ár 10-15 minýt saiyn tazalyq jumysy júrgizilip otyrady. Áýejaida 15 tempovizor ornatylǵan. Olar ushyp kelgen jáne ushyp ketetin ár jolaýshynyń dene qyzýyn táýlik boiy ólshep turady.
Teplovizorlardyń aqparaty áýejai qyzmetkerleri qadaǵalap otyratyn basqarý pýltine túsedi.
