Kólik politseileri elorda áýejaiynda ákimshilik quqyq buzýshylyq jasaǵan 55 jastaǵy jolaýshyny reisten túsirip aldy, dep habarlaidy "Ult aqparat".
«17 mamyr kúni Nur-Sultan qalasy áýejaiyndaǵy Jelilik politsiia bóliminiń kezekshi bólimine «Eir-Astana» áýe kompaniiasynyń ókilinen habarlama kelip tústi. Onda «Nur-Sultan-Aqtaý» baǵytyndaǵy reistiń jolaýshylarynyń biriniń masań kúide ózin dóreki ustap, qoǵamdyq orynda balaǵat sózder aitqandyǵy atap ótilgen. Tekserý barysynda kólik politseileri Aqtaý qalasynyń 55 jastaǵy turǵynyn anyqtady», - delingen Kóliktegi politsiia departamentiniń baspasóz qyzmeti málimetinde.
Atalǵan fakti boiynsha QR ÁQBtK-niń 440 jáne 434 baptary, iaǵni, alkogoldik ishimdikterdi ishý nemese qoǵamdyq oryndarǵa mas kúiinde kelý jáne usaq buzaqylyq boiynsha ákimshilik hattamalar toltyryldy.
Nur-Sultan qalalyq Mamandandyrylǵan aýdanaralyq ákimshilik sotynyń sheshimimen tártip buzýshyǵa 10 AEK kóleminde aiyppul salyndy.
«Atalǵan azamat áýe reisteriniń elimizdiń qalalary arasynda jańartylǵannan keiin ákimshilik quqyqbuzýshylyq jasaǵany úshin ushaqtan túsirilgen alǵashqy jolaýshy bolyp otyr», - dep naqtylady kólik politseileri.
Eske sala keteiik, 1 mamyrdan bastap Qazaqstan qalalary arasynda áýereisteriniń ushýy jańartyla bastaǵan bolatyn.
Biyldyń basynan beri elimizdiń kólik politseileri túrli ákimshilik quqyq buzýshylyqtar úshin 16 873 azamatty ákimshilik jaýapkershilikke tartty. Onyń ishinde alkogoldik ishimdikterdi ishkeni jáne qoǵamdyq oryndarǵa mas kúiinde kelgeni úshin 1631, usaq buzaqylyq jasaǵany úshin 318 adam jazalandy.
