Nursultan Nazarbaev atyndaǵy halyqaralyq áýejaidyń Jolaýshylar jáne júk tasymaly qyzmetiniń basshysy Qobylandy Kákimov TJ rejiminde áýejaidyń qalai jumys istep jatqanyn baiandady, dep habarlaidy QazAqparat.
«Shekaralar jabylyp, karantin rejimi engizilse de, bizdiń áýejai júk, tranzittik jáne gýmanitarlyq reisterdi qabyldap jatyr. Bul áýejaidyń belgili bir tabys tabýyna, aýyl sharýashylyǵy ónimderin eksporttap, agroónerkásiptik keshendi qoldaýǵa múmkindik beredi. Barlyq reisterdi oryndaýda sanitarlyq talaptar saqtalady», - dedi spiker tilshilerge bergen suhbatynda.
Onyń aitýynsha, TJ engizilgen kúnnen beri elordalyq áýejai 800-den astam tranzittik reis qabyldaǵan.
«Kún saiyn áýejaida 3-4 júk reisteri oryndalady. Bul ushý kestesine bailanysty. Táýlik boiy tranzittik júk reisterin tartý boiynsha kommertsiialyq jumystar júrgiziledi. Qazaqstan aýmaǵynan ushyp ótetin áýe kompaniialarymen bailanys ornatyldy. Áýe kemelerin qarsy alyp, ushyrý úshin arnaiy sanitarlyq turaqtar belgilendi», - dep atap ótti áýejai ókili.
9 sáýirde Qytaidan meditsina mamandary kelip, 5 tonna gýmanitarlyq kómek jetkizildi. Bul - áýejaiǵa qonǵan tórtinshi gýmanitarlyq kómek.
«Buǵan deiin Birikken Arab Ámirlikterinen kómek kelgen edi. 12 tonnaǵa jýyq gýmanitarlyq kómek jetkizilip, 20 tonnadan astam aýylsharýashylyq ónimderi eksporttaldy. Áýejai kún saiyn shyǵyndar men tabysyn eseptep otyr. Kommertsiialyq departament aldaǵy ýaqytta barlyq tsifrdy jariialaidy», - dedi Q. Kákimov.
Sonymen birge, spiker áýejai qyzmetkerleriniń 70% qashyqtan jumys isteý rejimine aýystyrylǵanyn aitty.
«Qazirgi ýaqytta áýejai qyzmetkerleri arasynda eshkim virýs juqtyrǵan joq. Sebebi, barlyq qyzmetkerler reiske qyzmet kórsetkende karantin talaptaryn saqtaidy. Reis pen jolaýshylar kólemi azaiǵandyqtan, ushý-qoný jolaǵy men jolaýshylar terminalyna, avtoturaq pen avtobýs alańdaryna jóndeý jumystary júrip jatyr», - dedi Q. Kákimov.
