Nursultan Nazarbaev halyqaralyq áýejaiy Eýropalyq Odaq elderiniń aýmaǵyna aviatsiialyq júk tasymaldaryn jeńildetilgen uiymdastyrý úshin qajetti shart RA-3 (Regulated Agents Third country) sertifikatyn resimdeý protsesin aiaqtady, dep habarlaidy "Ult aqparat" QR IIDM saityna silteme jasap.
Qazirgi ýaqytta Nur-Sultan qalasynyń áýejaiy rastalǵan mártebege ie Qazaqstandaǵy jalǵyz áýejai. Bul sertifikattyń bolýy aviakompaniialarǵa aviatsiialyq qaýipsizdik bóliginde qandai da bir shekteýlersiz astanalyq áýe ailaǵynan Eýroodaq elderine júk tasymaldaýǵa múmkindik beredi.
«Shyn máninde, aldyn ala aýdit kezinde Nursultan Nazarbaev halyqaralyq áýejaiy rásimderiniń sapasy maǵan qatty áser etti. Maǵan áýejaidyń barlyq qyzmetkerleri arasynda kórinetin «qaýipsizdik mádenieti» qatty áser etti», - dedi RA-3 sertifikattaýyn júrgizgen EO táýelsiz validatory.
Bul sertifikat elordalyq áýejaidyń júk terminalynda júkterdi óńdeý protsesi júkterdiń barlyq túri úshin Eýropalyq qaýipsizdik standarttaryna tolyq sáikes keletindigin rastaidy.
«RA-3 sertifikatsiiasyna júk terminaly obektileriniń keshendi aýditi, aviatsiialyq qaýipsizdik rásimderi, personaldy oqytýmen bailanysty ishki rásimder kirdi. Sonymen qatar, joǵary tehnologiialyq jabdyqtar men bilikti kadrlardyń bolýy aýdit nátijelerine oń áser etkenin atap ótkim keledi. RA-3 mártebesiniń bolýy kórinisti tolyǵymen ózgertedi: osy sátten bastap barlyq aviatasymaldaýshylar EO elderine júk tasymaldaý quqyǵyn avtomatty túrde paidalana alady. Bul kez kelgen (sonyń ishinde Eýropalyq) aviakompaniialarǵa astanalyq áýe qaqpalary arqyly operatsiialardy erkin oryndaýǵa múmkindik beredi», - dedi, «Nursultan Nazarbaev halyqaralyq áýejaiy» AQ Basqarma tóraǵasy Ǵabit Tájimuratov.
