Nur-Sultan qalasynyń ákimi Altai Kólginov sheshimin tabýdy talap etetin elordanyń eń ózekti úsh máselesin atady, dep habarlaidy QazAqparat.
«Birinshisi – bul salymshylardyń máselesi. Qazirgi tańda qalada 50-ge tarta problemalyq nysan bar. Olardyń qurylysy 5 nemese 10 jyldan asyp ketken. Al salymshylardyń sany 14 myńǵa jetip otyr. Olardyń problemalyq sanatta júrgenderi – 10,5 myń adam. Biz Memleket basshysynyń tapsyrmasy boiynsha ministrliktermen bul máseleni sheship jatyrmyz. Ár úi boiynsha naqty mehanizm bar», - dedi Altai Kólginov Úkimet otyrysynan keiin tilshilerdiń suraǵyna jaýap bere otyryp.
Onyń aitýynsha, atalmysh máselede aryz boiynsha daýlar, investorlar men salýshylarǵa qatysty máseleler, salymshylardyń óz arasyndaǵy kelispeýshilikter sekildi suraqtar bar.
«Mine, sol sebepti, ár úi boiynsha jeke jumys júrgizilýi tiis. Osy jyly 10 úidi paidalanýǵa bersek, kelesi jylǵy kezekte taǵy 15-i tur. Aldaǵy 3 jylda jaǵdaidy túpkilikti ózgertkimiz keledi», - dedi shahar basshysy.
Ákimniń aitýyna qaraǵanda, elorda úshin ózekti ekinshi másele – qala shetin abattandyrý.
«16 kent, qosylǵan turǵyn úi keshenderinde qala halqynyń 25 paiyzy ómir súrip jatyr. Ondaǵy halyq sany – 280 myń adam. Oǵan qatysty suraqtardy da úshke bólip otyrmyz: birinshisi – infraqurylym, ekinshisi – áleýmettik nysandar, úshinshisi – abattandyrý. Jyly aialdamalar, avtobýstardyń baǵdarlaryna kelgende qala shetindegi turǵyndar birshama qinalatynyn jasyrmaimyz. Buǵan qatysty Memleket basshysynyń jeke tapsyrmasy bar. Aldaǵy úsh jyldyń jospary bekitilgen», - dedi ol.
Altai Kólginov úshinshi máselege elordany gazdandyrý jumysyn jatqyzdy.
