Búginnen bastap elimizde barlyq buqaralyq sharalarǵa tyiym salyndy. Bul týraly Nur-Sultan qalalyq qoǵamdyq densaýlyqty saqtaý basqarmasynyń basshysy Sáýle Qisyqova aitty, dep habarlaidy QazAqparat.
«Koronavirýsyń taralýyna jol bermeý sharalary aiasynda Úkimet búginnen bastap, iaǵni 13 naýryzdan buqaralyq sharalarǵa tyiym salý týraly sheshim qabyldady. Qala basshylyǵy arnaiy aldyn alý sharalaryn júzege asyrýǵa kirisedi. Koronavirýs taralýynyń aldyn alý maqsatynda Nur-Sultan ákimdigi men Qoǵamdyq densaýlyqty saqtaý basqarmasy epidemiologiiaǵa qarsy rejimdi saqtai otyryp birqatar shara júrgizedi», - dedi ol.
Onyń atap ótýinshe, koronavirýspen kúreste Qytaidyń, Ońtústik Koreianyń jáne basqa da elderdiń álemdik tájiribeleri zerdelengen. Atalǵan tájiribeler koronavirýspen kúreste qoldanylatyn bolady.
«Koronavirýs oqiǵasy tirkelgen jaǵdaida diagnostika jasaityn, naýqasty atalǵan juqpaly aýrýdan emdeitin arnaiy meditsinalyq mekemeni anyqtadyq. Virýs juqtyrǵandardy emdeý úshin qalanyń syrtynda oqshaý turǵan ǵimarattan jeke statsionar belgilengen. Sondyqtan virýs juqtyrǵandar men basqa naýqastardyń joly qiylyspaidy. Birden aitaiyn, koronavirýsty diagnostikalaýda patsientter 4 sanatqa bólinedi. Patsientter densaýlyq jai-kúii jeńil, ortasha jáne aýyr retinde tekserýden ótedi. Munan bólek, úi karantininde bolatyn patsientter de bar», - dedi Sáýle Qisyqova.
