Nur-Sultan qalasynyń ákimdigi kópbalaly jáne jalǵyzbasty analardyń kásip bastaýyna kómek kórsetedi, dep habarlaidy QazAqparat tilshisi.
Ákimdiktiń jáne kásipkerlerdiń kómegimen úshinshi toptaǵy múgedek, jalǵyzbasty ana Gúlnur Jalǵasova balmuzdaq biznesin bastady. Onyń otbasy jeti jyldan beri elordada páter jaldap turady.
«Búgingi kúnge deiin túrli jumys istep kórdim. Múgedektigim bar, táýligine saǵattap jumys isteýge shamam joq. Qolaily jumys bolmaǵasyn, jeke kásipkerlik ashýdy oilap, ákimdikten kómek, keńes suradym. Olar áleýmettik kómek kórsetetin kásipkermen tanystyrdy. Kásipker óz dúkeniniń aldynan tegin oryn berdi. Ózim de 300 myń teńge aqsha jinap, tońazytqysh pen arba satyp aldym. Osylaisha, bir aida óz biznesimdi bastap kettim», - deidi G. Jalǵasova.
Gúlnur tabysynyń bir bóligin Turǵyn úi qurylys jinaq bankindegi esepshotyna aýdarady.
«Aiyna 35 myń teńgeden Turǵyn úi qurylys jinaq bankine tóleimin. Qysqa deiin óz páterimdi alam dep úmittenip júrmin. Tabysym da jaqsaryp qaldy. Shamamen Astana qalasyndaǵy ortasha ailyqty taýyp júrmin. Páteraqyǵa, balalaryma, ózime jetedi. Múgedekpin dep bireýdiń qolyna qarap otyrǵym kelmedi. Árkim óz otbasyn ózi asyraýy kerek dep esepteimin. Ózim siiaqty múmkindigi shekteýli adamdardy jumysqa alyp, kásibimdi ári qarai damytqym keledi. Qysta saýda oryndarymen sóilesip, jyly oryn izdestiremin», - deidi ol.
Taǵy bir kópbalaly, jalǵyzbasty ana Gúlmira Salybaevaǵa ákimdik óz úiiniń mańynan jemis-jidek satatyn dúńgirshek ornatyp berdi. Onyń 10, 8, 7 jastaǵy jáne 8 ailyq balalary bar.
«2012 jyly balalarymdy alyp, Ońtústik Qazaqstannan Astanaǵa qonys aýdardym. Páter jaldap turdyq. Kondýktor bolyp jumys istedim. Balalardyń ákesi keldi, biraq taǵy tastap ketti. Bala kútimimen úide otyrǵandyqtan, 6 balasy bar sińlime kóship bardym. Ol da jalǵyzbasty. Úide otyrǵan soń, ákimdikke baryp, jemis-jidek satatyn oryn alýǵa kómek suradym. Bastapqyda kómektesse, ózim dóńgeletip áketemin. Olar úidiń qasyna dúńgirshek ornatyp, jaryq jalǵap, ishindegi jemis-jidek, kókónisterge deiin toltyryp berdi. Mundai kómek bolaryn kútpedim», - deidi G. Salybaeva.
Endi Gúlmira sińlisimen birge jumys istep, balalarǵa qarailasyp, satý oryndaryn kóbeitkisi keledi.
«Elorda ákimdigi kómek surap kelgen barlyq analarǵa járdemdesýge tyrysady. Oqýǵa, kýrsqa bara almaityn, biliktiligin kóterýge ýaqyty jetpeitin, qarajat tabatyn múmkindigi joq kópbalaly analar bar. Olar bizge kishigirim biznes-josparlaryn ákeledi. Nemen ainalysqysy keletinin, qai aýdan, qai kósheniń yńǵaily bolatynyn aitady. Biznestiń áleýmettik jaýapkershiligi aiasynda, kásipkerlermen birlesip, múmkindiginshe kómektesýge tyrysamyz», - dedi Nur-Sultan qalasy ákiminiń baspasóz hatshysy Elvira Júrgenbaeva.
Onyń aitýynsha, kásipkerlik kómekte balasy kóp, múmkindigi shekteýli nemese asyraýshysy joq, kedeiliktiń shegine jetken otbasylarǵa basa mán beriledi.
Aita keteiik, elordalyq «Berekeli baspana» baǵdarlamasy aiasynda «Kópbalaly otbasy» sanatynda turǵyn 150 arendalyq páterge sertifikat berý bastaldy.
Arenda quny - páterdiń árbir sharshy metrine 70 teńgeden. Iaǵni, orta eseppen kópbalaly otbasylar aiyna 6-7 myń teńgege páter jaldap tura alady.
«Kópbalaly otbasy» sanatynda turǵyn úi kezeginde turǵandar Nur-Sultan qalasy ákimdiginiń «Turǵyn úi qory» kommýnaldyq memlekettik mekemesine (R.Qoshqarbaev kóshesi 39) júginýi tiis (bailanys nómiri: 79-34-50).
Búginde elordada 46 myń adam turǵyn úi kezeginde tur. Onyń 3 myńnan astamy - kópbalaly otbasy.
