Elordada dezinfektsiia jumystaryna 50-den astam tehnika, onyń ishinde 20 áskeri tehnika, 200 rotorlyq jáne sorǵy shashyratqysh jumyldyryldy. Bul týraly ortalyq kommýnikatsiialar qyzmetindegi brifingte Nur-Sultan qalasy ákiminiń orynbasary Altynbek Qaisaǵaliev aitty, dep habarlaidy QazAqparat.
«Ózderińiz biletindei, qazirgi tańda qalada koronavirýs infektsiiasyna qarsy belsendi jumys júrgizilip jatyr. Osyǵan bailanysty Nur-Sultan qalasy halqynyń densaýlyǵyn saqtaý jáne qaýipsizdigin qamtamasyz etý maqsatynda osy jyldyń 20 naýryzynan bastap qalanyń barlyq nysandarynda, adam kóp shoǵyrlanatyn jerlerde, sonymen qatar, turǵyn úi keshenderi men turǵyn alaptarynda aýqymdy dezinfektsiia jumysy júrgizilýde», - dedi ol.
Onyń atap ótýinshe, zalalsyzdandyrý jumystary QR Qorǵanys ministrligi radiohimiialyq jáne bakteriologiialyq áskeriniń, qala ákimdigi men dezinfektsiialyq jumystar jasaityn uiymdardyń kúshimen kúndelikti júrgizilýde. Dezinfektsiialyq sharalardy júrgizýge 50-den astam tehnika, onyń ishinde 20 birlik áskeri tehnika, 200 birlik rotorlyq jáne sorǵy shashyratqyshtary jumyldyryldy. Dezinfektsiia jumystaryna kúndelikti 470 dezinfektor-adam, sonyń ishinde QR Qorǵanys ministrliginen – 231 adam, dezinfektsiialyq jumystar jasaityn uiymdardan 239 adam qatysýda. Kúndelikti áskeriler kúshimen 10 baǵyt boiynsha dezinfektsiialyq óńdeý jumystary júrgizilýde.
«Qalanyń barlyq saýda oryndaryna irgeles jatqan aýmaqtaryna, meditsinalyq uiymdaryna, saýda ortalyqtaryna, shaǵyn saýda marketterine, barlyq ótkizý beketterine, meshitterge, aýdanaralyq aýmaqtarǵa, úi kireberisteri men liftilerge kúndelikti negizde BKS 5, dezosteril forte dezinfektsiialaýshy eritindilerimen óńdeý júrgiziledi. Paidalanylatyn dezinfektsiialaýshy quraldardyń mikrobtarǵa, virýstarǵa qarsy áser etetin kúshi bar jáne emdeý-profilaktikalyq mekemelerdi, kommýnaldyq qyzmet nysandaryn, taǵam óndirisi men qoǵamdyq tamaqtaný oryndaryn, sonymen qatar, saýda oryndaryn óńdeýge arnalǵan jáne janýarlar men adamdarǵa qaýipsiz», - dedi ákim orynbasary.
Altynbek Qaisaǵalievtiń sózine qaraǵanda, bul jumystarǵa dezinfektsiialyq quraldar satyp alyndy, búgingi kúni olardyń qory jetkilikti. 165 tonna dezqural - natrii gipohlorit satyp alyndy. Sonymen qatar, Dezosteril Forte men Dezosteril chas+ dezquraldary 270 litr kóleminde satyp alyndy. Olardy aralastyrý kezinde 200 tonnadan astam daiyn dezinfektsiialyq eritindi alynady.
«Zararsyzdandyrý jumystary aiasynda Nur-Sultan qalasy boiynsha 1529 úi, onyń ishinde 6375 kireberis jáne 1500 balalar men sport alańdarynda atalǵan jumystar atqaryldy. Bul óz kezeginde jalpy túrǵyn úilerdiń 80 paiyzdan astamyn quraidy. Sonymen qatar, Qaraótkel, Komsomolskii, Shubar, Zarechnyi, Depgorodok jáne Ońtústik-shyǵystyń oń jaq betindegi jeke menshik úilerdiń aýmaǵy arnaiy dezinfektsiialyq mashinalarymen óńdeldi. Bul jumystar kestege sai aryqarai jalǵasady. Paidalanylǵan qorǵaý quraldaryn jinaý jáne joiý úshin arnaiy ekobokstar ornatyldy», - dedi ol.
