Vaktsinalaýǵa qarsy adamdardyń ǵylym men meditsinaǵa esh qatysy joq. Mundai pikirdi S. Asfendiiarov atyndaǵy QazUMÝ jalpy immýnologiia kafedrasynyń meńgerýshisi Elmira Bitanova onlain brifing barysynda aitty, dep habarlaidy QazAqparat.
Immýnologtyń aitýynsha, mindetti ekpelerdiń qazaqstandyq kúntizbesi álemdegi úzdikteriniń biri. Muny álemdik ǵalymdar qaýymdastyǵy atap ótken.
Bizdiń elimizdegi barlyq mindetti ekpeler (memlekettik emhanada nemese jeke emhanada) biýdjet qarajaty esebinen tegin jasalady. Olardyń tizimi QR Úkimetiniń qaýlysymen bekitilgen.
«Bizdiń kúntizbe búkil álemniń ozyq tájiribesin qamtidy. Memleket vaktsinaǵa kóp aqsha jumsaýda. Jasalýy kerek vaktsinalardyń tolyq tizimi bar. Olardyń ishinde tumaý, jelsheshek, kene entsefaliti, qyzylshaǵa qarsy ekpeler bar. Sondai-aq, ońtústik - shyǵys Aziia elderine, Afrika jáne Arab elderine barýdy josparlap otyrǵandarǵa jáne epidjaǵdaiǵa qarai egiletin ekpeler bar», - dedi Elmira Bitanova.
Sonymen qatar, ol almatylyqtardy óz aǵzasyndaǵy antideneler sanyn qadaǵalamaýǵa shaqyrdy.
«Sebebi bul halyqqa jalǵan qorytyndy berýi múmkin. Antideneleri bolǵan kezde adamdar «bosańsyp», epidemiologiialyq jáne gigienalyq normalardy saqtaýdy qoiady»,- deidi ol.
Ǵalymdar vaktsinalaýdan keiin immýnitet 2-3 jyl saqtalady degen boljam jasap otyr. Vaktsina baqylaý ústinde.
«N.F.Gamaleia atyndaǵy epidemiologiia jáne mikrobiologiia ulttyq zertteý ortalyǵy qyzmetkerleri ózderi ázirlep jatqan vaktsinany osydan bir jarym jyl buryn synaqtan ótkizý úshin ózderine saldyrǵan. Antideneler mólsheri olarda osy kúnge deiin saqtalǵan. Onyń ústine, bul jai ǵana dáleldengen antideneler emes, bular protektivti, virýs beitaraptandyrady», - deidi spiker.
Osyǵan bailanysty Almaty immýnology halyqqa júginip, vaktsinatsiia alýǵa, sondai-aq, ne ǵylymǵa, ne meditsinaǵa esh qatysy joq vaktsinatsiiaǵa qarsy adamdardy tyńdamaýǵa shaqyrdy.
Aita keteiik, Almatyda 203 pýnkt, al olarda 1 809 meditsina qyzmetkerinen turatyn 406 egý brigadasy jumys isteidi. Qala boiynsha 1 aqpan men 18 sáýir aralyǵynda barlyǵy 134 484 adam ekpe saldyrdy.
