Óz taǵdyryn ózi aiqyndaýǵa alǵashqy qadam jasaǵan Qazaqstan úshin 1 jeltoqsan - memlekettilik tarihynyń mereili kúni sanalýǵa laiyqty. Joǵary Parlamenttiń bekitýimen 2012 jyly 1 jeltoqsan Qazaqstanda alǵash ret – Tuńǵysh Prezident kúni memlekettik mereke retinde atalyp ótip, bul barshamyz úshin qýanyshty oqiǵa boldy. Elbasyna degen el qurmetin airyqsha aiǵaqtaýǵa arnalǵan bul merekeniń dástúrlik is-sharaǵa ainalýǵa orny bar ekenin senimmen aita alamyz.
Otyrar aýdanynda osy aitýly merekege orai «Elin súigen, eli súigen Elbasy» atty taqyryptaǵy dóńgelek ústel ótti. Atalǵan sharaǵa aýdan ákimi Erlan Aitahanov arnaiy qatysyp, kemeńger basshynyń el tarihyndaǵy san qily kezeńderde oń sheshim qabyldap, memleketimizdi álem elderimen teń dárejede damytýǵa ózindik qosqan úlesi jaiynda sóz etti.
Qonaqtar aldymen Otyrar memlekettik arheologiialyq qoryq-murajaiy men aýdandyq ortalyq kitaphananyń «Elbasy - Ult Kóshbasshysy» atty kórmelerin tamashalady.
Shara barysynda sóz alǵan aýdan ákimi: «Tuńǵysh Prezident - Elbasy N.Á.Nazarbaevtyń kóregendik saiasatynyń arqasynda táýelsiz Qazaqstan Ortalyq Aziia óńirindegi, táýelsiz memleketter dostastyǵy elderiniń arasynda aldyńǵy orynǵa shyqty. Memleket basshysynyń júrgizip otyrǵan saliqaly ishki jáne syrtqy saiasaty áleýmettik-baǵdarly ekonomikasy bar zamanaýi, qarqyndy damýshy memleket qurýdy qamtamasyz etti. Eńbek qundylyǵy men jasampazdyqty bekite túsýge baǵyttalǵan mańyzdy baǵdarlamalyq qujat retinde Prezidenttiń «Qazaqstan-2050» el damýynyń dańǵyl jolyn baiyptaityn uzaq merzimdi strategiialyq baǵdarlamasyn usynyp, barshamyzdy «Máńgilik El» bolýǵa shaqyrǵan bolatyn. Sonymen qatar, kemel keleshek jolynda «Bolashaqqa baǵdar: Rýhani jańǵyrý», «Uly dalanyń jeti qyry» atty maqalalaryn jariialap, óskeleń urpaqty ulttyq qundylyqtarmen sýsyndaýǵa jol ashty. Elbasymyzdyń «Uly dalanyń jeti qyry» atty maqalasy kieli Otyrardyń tarihyna tyń serpin bermek. Keler jyly Otyrar qorǵanysyna 800 jyl. Qoinaýy tarihqa toly óńirimizde áli syry ashylmaǵan, beimálim tarihi oryndar jeterlik. Osy maqsatta alda aýqymdy jumystar kútip tur. Sondyqtan barshańyzdy El basshysy Nursultan Ábishuly Nazarbaevtyń el igiligi jolyndaǵy tamasha bastamalaryn júzege asyrýǵa úles qosyp, alǵa qoiǵan maqsattarǵa birlese jumys jasaýǵa shaqyramyn», - dedi.
Munan soń Prezidentimiz N.Á.Nazarbaevtyń ómiri men qazaq eli úshin jasaǵan uly isterinen syr shertetin beinebaian kórsetildi. Máni men taǵylymy mol beinebaiannan soń Otyrar memlekettik arheologiialyq qoryq – mýzeiiniń kishi ǵylymi qyzmetkeri, filosofiia ǵylymdarynyń magistri Erqoja Abdýahitov «Elbasy – elimniń tuǵyry biik tiregi» atty taqyryptaǵy baiandamasynda Memleket basshysynyń el tarihyndaǵy alar róli jaiynda oi qozǵasa, aýdandyq Ortalyq kitaphana bóliminiń qyzmetkeri Jámila Serikqyzy «Táýelsizdik el tilegi, Elbasy - el tiregi» atty taqyrypta baiandama jasap, eliniń qoldaýyna ie bolǵan kemeńger Elbasynyń ómir jolyna toqtaldy.
Sondai-aq sóz barysynda «Otyrar ádebieti jáne óneri» birlestiginiń tóraǵasy Saǵyndyq Qydyr men tarihshy Bekjan Beisenbai egemen elimizdiń mańdaiyna bitken Elbasy Nursultan Nazarbaevtyń el birligi, ulttar tatýlyǵy jolynda sińirgen eńbekteri jaiynda keńinen toqtaldy.
