Elimizdiń úsh oblysynda daýyl saldarynan 160-tan asta ǵimarat zardap shekti. Bul týraly QR IIM Tótenshe jaǵdailar komiteti jedel shtabynyń ókili Liýbov Ablanova aitty, dep habarlaidy "Ult aqparat".
«Aqmola, Qostanai jáne Soltústik Qazaqstan oblystarynyń 2 qalasy men 22 aýdanynda ekpini sekýndyna 30 metrge deiin jetken qatty daýyldyń saldarynan 160-tan astam ǵimarat pen qurylystyń shatyry qirady. Sondai-aq Aqmola jáne Qostanai oblystarynyń 9 aýdanynda elektr jelileri zaqymdanǵan. Zaqymdalǵan nysandar men materialdyq shyǵyndardyń kólemi qazirgi tańda anyqtalyp jatyr», - deidi ol.
Sonymen qatar ol Aqmola oblysynyń Býrabai aýdanynda qatty daýyldan bir adam qaza bolǵanyn eske saldy.
«Búgingi kúni aýa raiynyń qolaisyzdyǵyna bailanysty Aqmola, Qostanai jáne Soltústik Qazaqstan oblystarynda 12 respýblikalyq jáne Qostanai oblysynda 20 oblystyq mańyzy bar avtojol jabyldy. Aýa raiynyń nasharlaýyna bailanysty Tótenshe jaǵdailar komiteti men óńirlerdegi jedel shtabtyń jumysy jalǵasyp jatyr», - deidi Liýbov Ablanova.
