Qazaqstan Prezidenti Otan qorǵaýshy kúnine arnalǵan saltanatty jiynǵa qatysty, dep habarlaidy "Ult aqparat" Aqordaǵa silteme jasap.
Memleket basshysy Otan qorǵaýshy kúnine arnalǵan saltanatty jiynda sóz sóilep, sardarlar men sarbazdardy, ardagerlerdi merekemen quttyqtady.
«Osydan otyz jyl buryn Tuńǵysh Prezident Nursultan Ábishuly Nazarbaevtyń Jarlyǵymen Qazaqstannyń Qarýly Kúshteri quryldy. Bul memlekettigimizdi nyǵaitý jolyndaǵy mańyzdy qadam boldy», – dedi Qasym-Jomart Toqaev.
Prezident egemendik alǵan kezde áskeri áleýeti myqty armiia jasaqtaýǵa basa mán bergenimizdi, otanshyl ári kásibi mamandardyń arqasynda bul mindet oidaǵydai atqarylǵanyn atap ótti.
«Qorǵanys salasyndaǵy negizgi máseleler der kezinde sheshimin tapty. Osy mańyzdy jumysqa elimizdiń tuńǵysh Qorǵanys ministri, Halyq qaharmany Saǵadat Nurmaǵambetov ólsheýsiz úles qosty. Onyń mol tájiribesi Qarýly Kúshterimizdiń negizin qalaýǵa zor septigin tigizdi. Búginde «Jas ulan» áskeri mektebine jáne Qurlyq áskerleriniń áskeri institýtyna Saǵadat Nurmaǵambetovtiń esimi berilgen», – dedi Prezident.
Memleket basshysy aibyndy armiiamyz Táýelsizdigimizdiń qorǵany, Jańa Qazaqstannyń tiregi ekenin aityp, otanshyl ári qaisar sarbazdarymyz el qaýipsizdigin senimdi qorǵap turǵanyna toqtaldy.
«Olar batyr babalardyń dańqty jolyn laiyqty jalǵastyryp keledi. Qazaq úshin eldik pen erlik – egiz uǵymdar. Batyrlyq – qanymyzǵa sińgen qasiet. Qazybek bi aitqandai, «Biz – jerimizge jaý timesin dep, naizaǵa úki taqqan elmiz». Uly dala ulandary qashanda aq bilektiń kúshimen, aq naizanyń ushymen atamekenin qorǵai bilgen. Altaidan Atyraýǵa deiingi keń baitaq jerin urpaqqa miras etken. Biz amanatqa adal bolyp, elimizdiń tutastyǵy men tynyshtyǵyn saqtaý úshin bárin jasaimyz. Bul – Qazaqstannyń árbir azamatynyń qasietti boryshy», – dedi Qasym-Jomart Toqaev.
Prezident elimizdiń áskeri doktrinasy tek qorǵanysqa baǵyttalǵanyn, ulttyq múddelerdi qorǵaý máselesinde diplomatiiaǵa súienetinimizge erekshe mán berdi. Qasym-Jomart Toqaevtyń aitýynsha, bizdiń syrtqy saiasatymyz syndarly, salmaqty, eldiń ulttyq múddesin qorǵaýǵa baǵyttalǵandyqtan, memleketterdiń bárimen dostyq qarym-qatynas ornatyp kelemiz.
«Biraq buryn-sońdy bolmaǵan álemdik geostrategiialyq shielenis jaǵdaiynda elimizdiń qorǵanys qabiletin arttyrýdyń máni zor. Áskeri-tehnikalyq saladaǵy halyqaralyq yntymaqtastyqty damytý – Qazaqstan úshin mańyzdy. Bitimgerlik qyzmetiniń arqasynda Qazaqstan armiiasy álemdik deńgeide tanyldy. 1990 jyldary biz Tájikstanǵa alǵash ret bitimgerlik kúsh jiberdik. Qazaqstandyq áskeriler BUU men EQYU missiialary aiasynda tabysty qyzmet atqardy. Búginde bizdiń bitimgerlik kontingent Livan men Batys Saharada júr», – dedi Memleket basshysy.
Prezidenttiń pikirinshe, munyń bári Qazaqstannyń beibitshilik pen turaqtylyqty saqtaýǵa eleýli úles qosa alatyn senimdi seriktes retindegi bedelin nyǵaitady. Sonymen qatar Qarýly Kúshterdi joǵary tehnologiialyq qarý-jaraqpen jáne tehnikamen qamtamasyz etýge úlken mán beremiz. Naqty urys qimyldarynda tiimdiligin dáleldegen qarý úlgilerin satyp alamyz jáne otandyq kásiporyndarda shyǵaramyz.
«Búginde armiiamyz álemdik standartqa sai jabdyqtalǵan. Sonymen qatar jańa jahandyq syn-qaterler Qarýly Kúshterimizdiń jaýyngerlik qabiletin arttyrý úshin ońtaily sheshimder izdeýdi talap etedi. Sondyqtan, meniń tapsyrmam boiynsha joǵary mobildi jáne gibridti soǵystar júrgizýge qabiletti arnaiy operatsiialyq jasaqtar quryldy. Álemdegi sońǵy oqiǵalardyń tájiribesin eskere otyryp, biz áskeri is-qimyldardyń strategiiasy men taktikasyn únemi jetildirip otyramyz. Jeke quram júieli túrde jaýyngerlik daiyndyqty pysyqtaidy, aýqymdy oqý-jattyǵýlar ótkiziledi. Bolashaq ofitserlerdi daiarlaýdyń zamanaýi júiesi quryldy», – dedi Qasym-Jomart Toqaev.
Memleket basshysy áskeri bilim berý salasyna arnaiy toqtaldy. Onyń aitýynsha, ul-qyzdarymyz respýblikalyq áskeri mektepterde Otan qorǵaý isin meńgere bastaidy jáne elimizde úzdik áskeri oqý oryndary bar.
«Onyń kósh basynda turǵan Ulttyq qorǵanys ýniversiteti qaýipsizdik salasyndaǵy iri ǵylymi ortalyqqa ainaldy. Memleket áskeri qyzmetshilerdiń áleýmettik jaǵdaiyn jaqsartýǵa basa nazar aýdaryp keledi. Olarǵa baspana beriledi, basqa da jeńildikter usynylady, laiyqty jalaqy tólenedi. Jastar úshin áskeri boryshyn óteý jáne Qarýly Kúshter qatarynda kelisimshartpen qyzmet etý – abyroily mindet. Shyn máninde, armiia – ómir mektebi ǵana emes. Sonymen birge maqsaty aiqyn jáne otanshyl jastardyń bolashaǵyna jol ashady. Osy oraida, ásirese, basshylyq quramǵa zor jaýapkershilik júkteledi. Sizderdiń Otan aldyndaǵy adal qyzmetterińiz jastarǵa úlgi-ónege bolyp, airyqsha erik-jiger beredi», – dedi Prezident.
Qasym-Jomart Toqaev Uly Jeńis qarsańynda Otan qorǵaýshy kúnin toilaýdyń simvoldyq máni zor ekenin, Ekinshi dúniejúzilik soǵys adamzat tarihynda óshpes iz qaldyrǵanyn atap ótti. Prezidenttiń aitýynsha, soǵys kezinde halqymyz kózsiz erlik pen qaisarlyq kórsetti.
«Respýblikamyzda soǵysqa deiingi jyldary qurylǵan zaýyttar men soǵys kezinde kóshirilgen kásiporyndar armiiany qamtamasyz etýde, Jeńisti jaqyndatýda zor ról atqardy. Fashistik basqynshylarmen shaiqasta janqiiarlyq erlik kórsetkeni úshin Qazaqstannan shaqyrylǵan 500-den astam jaýynger Keńes Odaǵynyń Batyry ataǵyn aldy. Qan maidanda qazaqtyń arýlary da erlikpen shaiqasty. Qaharman qyzdarymyz Áliia Moldaǵulova men Mánshúk Mámetovanyń aty ańyzǵa ainaldy. Biyl Hiýaz Dospanovanyń týǵanyna 100 jyl tolady. Ol – 300-den astam áýe joryǵyn jasaǵan. Elimiz táýelsizdik alǵannan keiin áigili ushqyshqa «Halyq qaharmany» ataǵy berildi. Biraq áli de kóptegen otandasymyzdyń batyrlyǵy laiyqty baǵalanbai keledi. Sondyqtan tarihi ádildik ornatý – Otan aldyndaǵy qasterli mindetimiz», – dedi Qazaqstan Prezidenti.
Memleket basshysy sol sebepti, búgin surapyl soǵystaǵy erligi elenbei qalǵan batyrlarymyzǵa «Halyq qaharmany» ataǵyn berý týraly Jarlyqqa qol qoiǵanyn aityp, ataqty mergender Tóleýǵali Ábdibekov pen Ybyraiym Súleimenov jáne atqyshtar batalonynyń komandiri Aleksandr Nesmiianovtyń esimderin atap ótti.
«Osy qaharmandarymyzǵa tiisti ataqtaryn berý – tarihi ádildikti ornatý degen sóz. Biz dańqty erlerimizdiń rýhyna taǵzym etemiz. Maidangerler men tyl eńbekkerleriniń erligin jadymyzda jańǵyrtý – perzenttik paryzymyz. Olardyń ómir joly urpaqqa úlgi-ónege bola beredi», – dedi Qasym-Jomart Toqaev.
Prezident sóziniń sońynda jiynǵa qatysýshylardy Otan qorǵaýshy kúnimen jáne Jeńis meiramymen quttyqtap, merekelik kontsertti tamashalady.
