قازاقستان پرەزيدەنتٸ وتان قورعاۋشى كٷنٸنە ارنالعان سالتاناتتى جيىنعا قاتىستى, دەپ حابارلايدى "ۇلت اقپارات" اقورداعا سٸلتەمە جاساپ.
مەملەكەت باسشىسى وتان قورعاۋشى كٷنٸنە ارنالعان سالتاناتتى جيىندا سٶز سٶيلەپ, ساردارلار مەن ساربازداردى, ارداگەرلەردٸ مەرەكەمەن قۇتتىقتادى.
«وسىدان وتىز جىل بۇرىن تۇڭعىش پرەزيدەنت نۇرسۇلتان ەبٸشۇلى نازارباەۆتىڭ جارلىعىمەن قازاقستاننىڭ قارۋلى كٷشتەرٸ قۇرىلدى. بۇل مەملەكەتتٸگٸمٸزدٸ نىعايتۋ جولىنداعى ماڭىزدى قادام بولدى», – دەدٸ قاسىم-جومارت توقاەۆ.
پرەزيدەنت ەگەمەندٸك العان كەزدە ەسكەري ەلەۋەتٸ مىقتى ارمييا جاساقتاۋعا باسا مەن بەرگەنٸمٸزدٸ, وتانشىل ەرٸ كەسٸبي مامانداردىڭ ارقاسىندا بۇل مٸندەت ويداعىداي اتقارىلعانىن اتاپ ٶتتٸ.
«قورعانىس سالاسىنداعى نەگٸزگٸ مەسەلەلەر دەر كەزٸندە شەشٸمٸن تاپتى. وسى ماڭىزدى جۇمىسقا ەلٸمٸزدٸڭ تۇڭعىش قورعانىس مينيسترٸ, حالىق قاھارمانى ساعادات نۇرماعامبەتوۆ ٶلشەۋسٸز ٷلەس قوستى. ونىڭ مول تەجٸريبەسٸ قارۋلى كٷشتەرٸمٸزدٸڭ نەگٸزٸن قالاۋعا زور سەپتٸگٸن تيگٸزدٸ. بٷگٸندە «جاس ۇلان» ەسكەري مەكتەبٸنە جەنە قۇرلىق ەسكەرلەرٸنٸڭ ەسكەري ينستيتۋتىنا ساعادات نۇرماعامبەتوۆتٸڭ ەسٸمٸ بەرٸلگەن», – دەدٸ پرەزيدەنت.
مەملەكەت باسشىسى ايبىندى ارمييامىز تەۋەلسٸزدٸگٸمٸزدٸڭ قورعانى, جاڭا قازاقستاننىڭ تٸرەگٸ ەكەنٸن ايتىپ, وتانشىل ەرٸ قايسار ساربازدارىمىز ەل قاۋٸپسٸزدٸگٸن سەنٸمدٸ قورعاپ تۇرعانىنا توقتالدى.
«ولار باتىر بابالاردىڭ داڭقتى جولىن لايىقتى جالعاستىرىپ كەلەدٸ. قازاق ٷشٸن ەلدٸك پەن ەرلٸك – ەگٸز ۇعىمدار. باتىرلىق – قانىمىزعا سٸڭگەن قاسيەت. قازىبەك بي ايتقانداي, «بٸز – جەرٸمٸزگە جاۋ تيمەسٸن دەپ, نايزاعا ٷكٸ تاققان ەلمٸز». ۇلى دالا ۇلاندارى قاشاندا اق بٸلەكتٸڭ كٷشٸمەن, اق نايزانىڭ ۇشىمەن اتامەكەنٸن قورعاي بٸلگەن. التايدان اتىراۋعا دەيٸنگٸ كەڭ بايتاق جەرٸن ۇرپاققا ميراس ەتكەن. بٸز اماناتقا ادال بولىپ, ەلٸمٸزدٸڭ تۇتاستىعى مەن تىنىشتىعىن ساقتاۋ ٷشٸن بەرٸن جاسايمىز. بۇل – قازاقستاننىڭ ەربٸر ازاماتىنىڭ قاسيەتتٸ بورىشى», – دەدٸ قاسىم-جومارت توقاەۆ.
پرەزيدەنت ەلٸمٸزدٸڭ ەسكەري دوكتريناسى تەك قورعانىسقا باعىتتالعانىن, ۇلتتىق مٷددەلەردٸ قورعاۋ مەسەلەسٸندە ديپلوماتيياعا سٷيەنەتٸنٸمٸزگە ەرەكشە مەن بەردٸ. قاسىم-جومارت توقاەۆتىڭ ايتۋىنشا, بٸزدٸڭ سىرتقى ساياساتىمىز سىندارلى, سالماقتى, ەلدٸڭ ۇلتتىق مٷددەسٸن قورعاۋعا باعىتتالعاندىقتان, مەملەكەتتەردٸڭ بەرٸمەن دوستىق قارىم-قاتىناس ورناتىپ كەلەمٸز.
«بٸراق بۇرىن-سوڭدى بولماعان ەلەمدٸك گەوستراتەگييالىق شيەلەنٸس جاعدايىندا ەلٸمٸزدٸڭ قورعانىس قابٸلەتٸن ارتتىرۋدىڭ مەنٸ زور. ەسكەري-تەحنيكالىق سالاداعى حالىقارالىق ىنتىماقتاستىقتى دامىتۋ – قازاقستان ٷشٸن ماڭىزدى. بٸتٸمگەرلٸك قىزمەتٸنٸڭ ارقاسىندا قازاقستان ارميياسى ەلەمدٸك دەڭگەيدە تانىلدى. 1990 جىلدارى بٸز تەجٸكستانعا العاش رەت بٸتٸمگەرلٸك كٷش جٸبەردٸك. قازاقستاندىق ەسكەريلەر بۇۇ مەن ەقىۇ ميسسييالارى اياسىندا تابىستى قىزمەت اتقاردى. بٷگٸندە بٸزدٸڭ بٸتٸمگەرلٸك كونتينگەنت ليۆان مەن باتىس ساحارادا جٷر», – دەدٸ مەملەكەت باسشىسى.
پرەزيدەنتتٸڭ پٸكٸرٸنشە, مۇنىڭ بەرٸ قازاقستاننىڭ بەيبٸتشٸلٸك پەن تۇراقتىلىقتى ساقتاۋعا ەلەۋلٸ ٷلەس قوسا الاتىن سەنٸمدٸ سەرٸكتەس رەتٸندەگٸ بەدەلٸن نىعايتادى. سونىمەن قاتار قارۋلى كٷشتەردٸ جوعارى تەحنولوگييالىق قارۋ-جاراقپەن جەنە تەحنيكامەن قامتاماسىز ەتۋگە ٷلكەن مەن بەرەمٸز. ناقتى ۇرىس قيمىلدارىندا تيٸمدٸلٸگٸن دەلەلدەگەن قارۋ ٷلگٸلەرٸن ساتىپ الامىز جەنە وتاندىق كەسٸپورىنداردا شىعارامىز.
«بٷگٸندە ارمييامىز ەلەمدٸك ستاندارتقا ساي جابدىقتالعان. سونىمەن قاتار جاڭا جاھاندىق سىن-قاتەرلەر قارۋلى كٷشتەرٸمٸزدٸڭ جاۋىنگەرلٸك قابٸلەتٸن ارتتىرۋ ٷشٸن وڭتايلى شەشٸمدەر ٸزدەۋدٸ تالاپ ەتەدٸ. سوندىقتان, مەنٸڭ تاپسىرمام بويىنشا جوعارى موبيلدٸ جەنە گيبريدتٸ سوعىستار جٷرگٸزۋگە قابٸلەتتٸ ارنايى وپەراتسييالىق جاساقتار قۇرىلدى. ەلەمدەگٸ سوڭعى وقيعالاردىڭ تەجٸريبەسٸن ەسكەرە وتىرىپ, بٸز ەسكەري ٸس-قيمىلداردىڭ ستراتەگيياسى مەن تاكتيكاسىن ٷنەمٸ جەتٸلدٸرٸپ وتىرامىز. جەكە قۇرام جٷيەلٸ تٷردە جاۋىنگەرلٸك دايىندىقتى پىسىقتايدى, اۋقىمدى وقۋ-جاتتىعۋلار ٶتكٸزٸلەدٸ. بولاشاق وفيتسەرلەردٸ دايارلاۋدىڭ زاماناۋي جٷيەسٸ قۇرىلدى», – دەدٸ قاسىم-جومارت توقاەۆ.
مەملەكەت باسشىسى ەسكەري بٸلٸم بەرۋ سالاسىنا ارنايى توقتالدى. ونىڭ ايتۋىنشا, ۇل-قىزدارىمىز رەسپۋبليكالىق ەسكەري مەكتەپتەردە وتان قورعاۋ ٸسٸن مەڭگەرە باستايدى جەنە ەلٸمٸزدە ٷزدٸك ەسكەري وقۋ ورىندارى بار.
«ونىڭ كٶش باسىندا تۇرعان ۇلتتىق قورعانىس ۋنيۆەرسيتەتٸ قاۋٸپسٸزدٸك سالاسىنداعى ٸرٸ عىلىمي ورتالىققا اينالدى. مەملەكەت ەسكەري قىزمەتشٸلەردٸڭ ەلەۋمەتتٸك جاعدايىن جاقسارتۋعا باسا نازار اۋدارىپ كەلەدٸ. ولارعا باسپانا بەرٸلەدٸ, باسقا دا جەڭٸلدٸكتەر ۇسىنىلادى, لايىقتى جالاقى تٶلەنەدٸ. جاستار ٷشٸن ەسكەري بورىشىن ٶتەۋ جەنە قارۋلى كٷشتەر قاتارىندا كەلٸسٸمشارتپەن قىزمەت ەتۋ – ابىرويلى مٸندەت. شىن مەنٸندە, ارمييا – ٶمٸر مەكتەبٸ عانا ەمەس. سونىمەن بٸرگە ماقساتى ايقىن جەنە وتانشىل جاستاردىڭ بولاشاعىنا جول اشادى. وسى ورايدا, ەسٸرەسە, باسشىلىق قۇرامعا زور جاۋاپكەرشٸلٸك جٷكتەلەدٸ. سٸزدەردٸڭ وتان الدىنداعى ادال قىزمەتتەرٸڭٸز جاستارعا ٷلگٸ-ٶنەگە بولىپ, ايرىقشا ەرٸك-جٸگەر بەرەدٸ», – دەدٸ پرەزيدەنت.
قاسىم-جومارت توقاەۆ ۇلى جەڭٸس قارساڭىندا وتان قورعاۋشى كٷنٸن تويلاۋدىڭ سيمۆولدىق مەنٸ زور ەكەنٸن, ەكٸنشٸ دٷنيەجٷزٸلٸك سوعىس ادامزات تاريحىندا ٶشپەس ٸز قالدىرعانىن اتاپ ٶتتٸ. پرەزيدەنتتٸڭ ايتۋىنشا, سوعىس كەزٸندە حالقىمىز كٶزسٸز ەرلٸك پەن قايسارلىق كٶرسەتتٸ.
«رەسپۋبليكامىزدا سوعىسقا دەيٸنگٸ جىلدارى قۇرىلعان زاۋىتتار مەن سوعىس كەزٸندە كٶشٸرٸلگەن كەسٸپورىندار ارمييانى قامتاماسىز ەتۋدە, جەڭٸستٸ جاقىنداتۋدا زور رٶل اتقاردى. فاشيستٸك باسقىنشىلارمەن شايقاستا جانقييارلىق ەرلٸك كٶرسەتكەنٸ ٷشٸن قازاقستاننان شاقىرىلعان 500-دەن استام جاۋىنگەر كەڭەس وداعىنىڭ باتىرى اتاعىن الدى. قان مايداندا قازاقتىڭ ارۋلارى دا ەرلٸكپەن شايقاستى. قاھارمان قىزدارىمىز ەلييا مولداعۇلوۆا مەن مەنشٷك مەمەتوۆانىڭ اتى اڭىزعا اينالدى. بيىل حيۋاز دوسپانوۆانىڭ تۋعانىنا 100 جىل تولادى. ول – 300-دەن استام ەۋە جورىعىن جاساعان. ەلٸمٸز تەۋەلسٸزدٸك العاننان كەيٸن ەيگٸلٸ ۇشقىشقا «حالىق قاھارمانى» اتاعى بەرٸلدٸ. بٸراق ەلٸ دە كٶپتەگەن وتانداسىمىزدىڭ باتىرلىعى لايىقتى باعالانباي كەلەدٸ. سوندىقتان تاريحي ەدٸلدٸك ورناتۋ – وتان الدىنداعى قاستەرلٸ مٸندەتٸمٸز», – دەدٸ قازاقستان پرەزيدەنتٸ.
مەملەكەت باسشىسى سول سەبەپتٸ, بٷگٸن سۇراپىل سوعىستاعى ەرلٸگٸ ەلەنبەي قالعان باتىرلارىمىزعا «حالىق قاھارمانى» اتاعىن بەرۋ تۋرالى جارلىققا قول قويعانىن ايتىپ, اتاقتى مەرگەندەر تٶلەۋعالي ەبدٸبەكوۆ پەن ىبىرايىم سٷلەيمەنوۆ جەنە اتقىشتار باتالونىنىڭ كومانديرٸ الەكساندر نەسمييانوۆتىڭ ەسٸمدەرٸن اتاپ ٶتتٸ.
«وسى قاھارماندارىمىزعا تيٸستٸ اتاقتارىن بەرۋ – تاريحي ەدٸلدٸكتٸ ورناتۋ دەگەن سٶز. بٸز داڭقتى ەرلەرٸمٸزدٸڭ رۋحىنا تاعزىم ەتەمٸز. مايدانگەرلەر مەن تىل ەڭبەككەرلەرٸنٸڭ ەرلٸگٸن جادىمىزدا جاڭعىرتۋ – پەرزەنتتٸك پارىزىمىز. ولاردىڭ ٶمٸر جولى ۇرپاققا ٷلگٸ-ٶنەگە بولا بەرەدٸ», – دەدٸ قاسىم-جومارت توقاەۆ.
پرەزيدەنت سٶزٸنٸڭ سوڭىندا جيىنعا قاتىسۋشىلاردى وتان قورعاۋشى كٷنٸمەن جەنە جەڭٸس مەيرامىمەن قۇتتىقتاپ, مەرەكەلٸك كونتسەرتتٸ تاماشالادى.
