Foto: ULT.KZ
Qaraǵandy oblysynyń Saran qalasynda qýattylyǵy jylyna 3,5 mln shina shyǵaratyn zaýyt jumys istep jatyr. Bul zaýyt elimizdegi alǵashqy jáne jalǵyz shina óndirýshi zaýyt. Jeńil jáne júk kólikterine arnalǵan shinalar "Attar" brendimen shyǵarylady.
2021 jyldyń 5 sáýirinde qurylysy bastalǵan mekeme 2024 jyly iske qosylyp, jýyq arada alǵashqy 1 millionynshy shinasyn shyǵarmaq.
Foto: ULT.KZ
Shina zaýytynyń direktory Býrganov Radii Faridulynyń aitýynsha "Attar" shinalaryn Qazaqstan azamattary tutynatyn bolady jáne Eýropa men Orta Aziia elderine eksporttalady.
Sýrette Radii Býrganov. ULT.KZ
"Bizdiń shinalar naryqtyq baǵada satylatyn bolady. Qazirgi ýaqytta Qazaqstanda jalǵyz shina zaýyty - biz. Biraq basqa elderde mundai zaýyttar kóp. Biz sapasy joǵary shinalar shyǵarý arqyly naryqqa ornyǵamyz dep oilaimyz. Biz eń birinshi sapaǵa mán beremiz", - deidi Radii Fariduly.
Foto: sapasy tekserilip jatqan shina. ULT.KZ
Aýmaǵy 76,8 ga jerdi alyp jatqan zaýytqa 228,8 mlrd teńge ($520,2 mln) investitsiia tartylǵan eken, onyń 140 mlrd teńgesi (58%) tikelei sheteldik investitsiia kórinedi.
"Óndiris kezeńniń barysynda shikizatty daiyndaý, qospalardy ázirleý, "jasyl" shinany jinaýdan bastap výlkanizatsiiaǵa deiingi sapany baqylap, barlyq tehnologiialyq protsesterdi biryńǵai rettik júiede júzege asyratyn tolyq tsikldy qamtidy. Zaýytta 800-ge jýyq jabdyq ornatylǵan. Iaǵni shinalardy óndirý protsessi tolyqtai ózimizde júzege asady", -dep otyr zaýyt direktory.
Kásiporyn belsendi damyp keledi jáne óz qyzmetkerleri úshin qolaily jaǵdai jasaýǵa tyrysýda. Qazirgi ýaqytta zaýytta 530-dan astam qyzmetker jumys isteidi. Olardyń sanyn 1 125 adamǵa deiin arttyrý josparlanyp otyr eken.
"Bizdiń qyzmetkerler negizinen osy Qaraǵandy oblysy men Saran qalasynyń turǵyndary. Sondyqtan olardy jumys ornyna deiin tegin tasymaldaimyz, Ashanamyzda tamaqtanýǵa 62% jeńildik jasalǵan. Mysaly olardyń túski astary jeńildigimen shamamen 500 teńge shyǵady. Biyl sáýir aiynan bastap jalaqyny 12%-ǵa indeksteý júrgizildi. Sonymen birge, Saran ákimdigimen birlesip qyzmetkerler úshin jeńildetilgen turǵyn úi baǵdarlamasy daiyndalýda", -deidi Radii Býrganov.
Kásiporynda ortasha jalaqy 366 myń teńgeden asady eken. Zaýyt direktorynyń sózinshe kásiporynda qurylǵylar avtomattandyrylǵan, kompiýtermen basqarylady.
Foto: ULT.KZ
Zaýyt tarapynan patronaj mektebi men Uly Otan soǵysynyń balalaryn qoldaýǵa arnalǵan baǵdarlamalaryn iske asyrýda. Sondai-aq, Saran kolledjiniń stýdentteri úshin taǵylymdamalar uiymdastyryldy. Bul jas mamandarǵa tájiribe alýǵa jáne kompaniiada mansap bastaýǵa múmkindik beredi. Sonymen qatar, qyzmetkerler úshin ártúrli korporativtik is-sharalar, sonyń ishinde sporttyq týrnirler men merekelik is-sharalar uiymdastyrylady. Dástúr boiynsha qyzmetkerlerdiń balalaryna jańa jylǵa syilyqtar berý, qýanysh pen merekelik kóńil-kúi syilaý qalyptasqan.
Sýrette Evgenii Daniliýk. ULT.KZ
Protektorly agregat mashinisti Evgenii Daniliýk zaýyt qurylǵaly jumys istep keledi eken. Onyń sózinshe mekeme qyzmetkerlerge barlyq jaǵdai jasaǵan.
"Biz tájiribeden ótip, biliktiligimizdi arttyryp turamyz. Ózim 2000-shy jyldary avto-dánekerleýshi mamandyǵy boiynsha Orta-Kásiptik bilim alǵanmyn. Biraq mansapta ósý úshin Joǵarǵy Oqý Ornyna túsýdi oilap júrmin. Zaýytta jaǵdaiymyz jasalǵan, jalaqymyz kóńilimizden shyǵady. Tipti ashanamyz alys degen shaǵymymyzǵa jetkizý qyzmetin uiymdastyryp berdi. Ádemi shkafym, jumsaq kreslom bar. Odan artyq ne kerek?" -dep jymidy Evgenii Daniliýk.
Foto: ULT.KZ
Jobany júzege asyrýdyń barlyq kezeńinde Tatneft tobynyń (Nijnekamsk jáne Vsevolojsk qalalaryndaǵy shina zaýyttary) shina óndiristerinde biliktilikti arttyra otyryp, óndiristegi qyzmetkerlerge berilgen bilimdi tájiribede qoldanýǵa múmkindik berdi. Qyzmetkerlerdiń alatyn biliktiligi men mamandyǵyna bailanysty oqý jáne taǵylymdama uzaqtyǵy 6 aidan 18 aiǵa deiin sozyldy. Kásiporyn qyzmetkerlerge kásibi turǵyda jetilýine jáne órkendeýine kómektesetin ártúrli oqytý jáne damytý baǵdarlamalaryn usynady.
Foto: ULT.KZ
