Qazaqstanda jol qaýipsizdigin baǵalaýdyń InternationalRoadAssessmentProgramme halyqaralyq júiesin engizý júrgizilýde. Atalǵan joba biylǵy jyldyń qańtarynan bastap Dúniejúzilik banktiń qoldaýymen iske asýda. Ony QR IIDM Avtomobil joldary komiteti, «SweRoad» kompaniiasy jáne «Qazaqstan jol ǵylymi-zertteý institýty» birlesip júzege asyryp jatyr, dep habarlaidy "Ult aqparat".
Búginge deiin «Qazjol ǴZI» AQ men «Jol aktivteriniń ulttyq sapa ortalyǵy» RMK mamandary Aqmola, Soltústik Qazaqstan, Qostanai, Aqtóbe, Qyzylorda, Túrkistan, Jambyl, Almaty oblystary jáne Almaty qalasynyń joldary men belgilerin arnaiy qurylǵyǵa túsirip, baǵasyn bergen.
Joba aiasynda 25 ulttyq sarapshy oqytýdan ótip jatyr. Olar joldardy derbes baǵalaýda. Avtomobil joldarynyń qaýipsizdigine tolyq ári naqty baǵa berý úshin jol júiesi ár 100 metr saiyn 50 parametr boiynsha kodtalýda. Jolshylar osylaisha 5700 shaqyrym joldy zerttep úlgergen. Atap aitsaq, bul – «Batys Eýropa – Batys Qytai» dálizi, sondai-aq «Nur-Sultan – Petropavl», «Nur-Sultan – Atbasar», «Qostanai – Qarabutaq», «Shymkent – Sarayǵash», «Almaty – Taldyqorǵan» avtojoldary. Jalpy barlyǵy 6200 shaqyrym joldy baǵalaý josparlanypty.
Kodtaý úrdisi aiaqtalǵannan keiin, joldyń ár ýchastkesine IRAP standarttary men nusqaýlaryna sáikes bes baldyq juldyzshalar reitingi beriletin bolady. Bul óz kezeginde qaýipsizdik kórsetkishterin jaqsartyp, jol-kólik oqiǵalaryn azaitýǵa septigin tigizedi.
Joba jol júrý qaýipsizdigin jaqsartý boiynsha investitsiialyq jospardy jáne IRAP ozyq bilimderiniń ulttyq platformasyn qurýǵa múmkindik bermek. Budan bólek, atalǵan júieni ulttyq zańnamaǵa engizý boiynsha egjei-tegjeili usynystar ázirleý kózdelgen.
Joldardy baǵalaýdyń halyqaralyq júiesi Ortalyq Aziia elderi men TMD alǵash ret Qazaqstanda engizilip jatqanyn aityp ótken jón. Atalǵan baǵdarlama boiynsha baǵalaý búginge deiin 100-den astam memlekette júzege asqan eken.
