Elimizdiń eńbek naryǵynyń turaqtylyǵyna qaýip bar. Bul týraly Úkimet otyrysynda QR Eńbek jáne halyqty áleýmettik qorǵaý ministri Birjan Nurymbetov aitty, dep habarlaidy QazAqparat.
«Osy kúnge deiingi eńbek naryǵy jaǵdaiy turaqty bolǵanymen, syrtqy naryqta qalyptasyp jatqan faktorlarǵa bailanysty elimizdiń eńbek naryǵynyń turaqtylyǵyna qaýip týý táýekeli boljanady. Onyń ishinde jumyskerlerdiń bosatylý múmkindigi, jańa qurylatyn jumys oryndarynyń azaiýy, jumyssyzdyq deńgeiiniń ósýi bar. Elimizde osyndai keri áserlerdi boldyrmaý maqsatynda jappai jańa jumys oryndaryn qurýǵa baǵyttalǵan daǵdarysqa qarsy jańa sharalardy qamtityn Jol kartasy ázirlenip jatyr»,- dedi ministr.
Onyń atap ótýinshe, jol kartasynda 2009-2010 jyldary oń nátijesin bergen, jumyssyzdar sanynyń óspeýine áser etken áleýmettik infraqurylymdyq jobalardy iske asyrý sharalary kózdeledi.
«Birinshiden - áleýmettik-mádeniet nysandaryn, iaǵni, bilim berý, densaýlyq saqtaý, áleýmettik qamsyzdandyrý, mádeniet, sport, oiyn-saýyq jáne demalys nysandaryn qaita qurylymdaý, kúrdeli jáne aǵymdaǵy jóndeý. Ekinshiden - turǵyn úi-kommýnaldyq sharýashylyq nysandaryn jańǵyrtý, kúrdeli, ortasha jáne aǵymdaǵy jóndeý. Bul - sýmen qamtý, káriz nysandary, gazben, jylýmen, elektrmen jabdyqtaý júieleri», - dedi ol.
Ministrdiń aitýynsha, úshinshiden injenerlik-kólik infraqurylymyn jańǵyrtý, kúrdeli, ortasha jáne aǵymdaǵy jóndeý jobalary qolǵa alynady. Oǵan qalalyq avtomobil joldary, kentishilik jáne aýylishilik joldar, kirme joldar, aýdandyq mańyzy bar joldar, trotýarlar, bógetter, dambalar men kópirler jóndeý kiredi. Tórtinshiden eldi mekenderdi abattandyrý júrgiziledi.
«Atalǵan infraqurylymdyq jobalardyń tizbesin jáne jańǵyrtý suranysyn «Atameken» Ulttyq kásipkerler palatasy júrgizgen óńirlerdiń problemalyq máseleleriniń skriningi negizinde anyqtaý usynylady», - dedi Birjan Nurymbetov.
